السلام عليكم ورحمه الله بالدارجي كدا... انحنا عارفين مواطن كت | إحياء سنن النبي صل الله عليه وسلم♡

السلام عليكم ورحمه الله
بالدارجي كدا... انحنا عارفين مواطن كتيرة فيها الدعاء بكون مُجاب.. مثلاً ليلة القدر والدعاء يوم عرفة.. وآخر ساعة في عصر الجمعة وغيرها...بس الاوقات دي واسعة وفضفاضة و النفس بتكسل تدعو في المواطن دي لأنك بتقول ممكن اوافقها وممكن لأ عشان كده بنكسر الحنك ... لكن في حديث بنغفل عنو وحتى المشايخ نادراً ما يذكّروا بيهو الناس

طيب الحديث بيقول

*مَنْ تَعَارَّ مِنْ اللَّيْلِ فَقَالَ: لَا إِلَهَ إِلَّا اللَّهُ وَحْدَهُ لَا شَرِيكَ لَهُ لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ، الْحَمْدُ لِلَّهِ، وَسُبْحَانَ اللَّهِ، وَلَا إِلَهَ إِلَّا اللَّهُ، وَاللَّهُ أَكْبَرُ، وَلَا حَوْلَ وَلَا قُوَّةَ إِلَّا بِاللَّهِ، ثُمَّ قَالَ: اللَّهُمَّ اغْفِرْ لِي أَوْ دَعَا، اسْتُجِيبَ لَهُ، فَإِنْ تَوَضَّأَ وَصَلَّى قُبِلَتْ صَلَاتُهُ.*

طيب تعارّ من الليل.. يعني كان نايم وصحى فجأة.... مثلاً.. زول شخصيتو قلقة أو بجيهو أرق كتير ونومو متقطع
فسبحان الله حتى القلق الزي دا الإنسان يُؤجَر عليهو والحديث دا مخصص للناس الزي ديل واغلبنا انحنا الأطباء بنعاني من الحاجة دي

طيب .. الحديث دا ورد في صحيح البخاري ...
يعني ضمان وقطع شك إنو لو قلت الذكر دا في اللحظة ديك ف ربنا ح يستجيب دعاك .. ف طالما عندك فرصة زي دي لشنو تغفل عنها ؟

طيب من شروط الحديث دا انك تكون نايم علي طهارة لأنو في رواية تانية بتقول (ما من عبدٍ باتَ على طُهورٍ، ثمَّ تعار منَ اللَّيلِ ..) .. وانك تصحى بدون ارادتك ..لا تصحى بمنبه ولا يصحيك زول .. وانك تقول الذكر دا قبل أي حاجة

الشق التاني من الحديث بقول (فَإِنْ تَوَضَّأَ وَصَلَّى قُبِلَتْ صَلَاتُهُ) طيب .. بما إني كسلان وانت كسلان فخليك في سريرك وما تقوم زاتو ...بس عليك الله قول الذكر دا .. ان شاء الله لو حتى تكتبو في ورقة وتختها تحت المخدة وتضوي بالتلفون لما تصحى .. لأنو والله بستحق ...

أنا كان ممكن انشر نص الحديث وخلاص .. لكن المعط الكتير وانفعالي دا تذكيراً بأهميتو .. واتذكروني معاكم في الدعوات ال حتدعوها.. اقول ليكم حاجة .. ما تتذكروني زاتو اتذكروا الحديث دا بس لما تصحوا من النوم


ويارب بعد دا تتذكروهوا