2022-06-29 12:32:27
انتبهوا...
- أول عشرة أيام من شهر ذي الحجة اقتربت !
- مالها الأيام دي ؟
- قال تعالى :- { وَالْفَجْرِ * وَلَيَالٍ عَشْرٍ }
- ايه دا هى مهمه جدا كدا عند ربنا لدرجة أنه سبحانه أقسم بيها !
- روى البخاري من حديث ابن عباس رضي الله عنهما انه قال رسول الله صلى الله عليه وسلم: (ما من أيام العمل الصالح فيها أحبّ إلى الله من هذه الأيام - يعني أيام العشر - قالوا: يا رسول الله ولا الجهاد في سبيل الله ؟ قال: ولا الجهاد في سبيل الله، إلا رجل خرج بنفسه وماله فلم يرجع من ذلك بشيء .)
= يعنى ايييييييه ؟؟
يعني ثواب العشر الأوائل يساوي ثواب واحد أنفق كل ماله وحياته وروحه فى الجهاد فى سبيل الله
يعنى اللى زعل أنه ضيع #رمضان منه ومقدرش يعمل اللى كان مخططله
ربنا رحيم أووووى ربنا أعطانا فرصة بس متضيعهاش هى كمان ربنا أعطانا فرصة أكبر من فرصة رمضان !
رسولنا الحبيب صلى الله عليه وسلم قال :- " أفضل أيام الدنيا ايام العشر "
أما بالنسبة للصيام بقى !!
صيام يوم هيكفر ذنوب سنتين !! وهو يوم عرفه
نجتهد فى الصيام على قد ما نقدر احنا عايزين نكفر عن ذنوبنا والله .
الصيام أجره إنه بيبعد عن وجهك النار 70 خريفا
الأجر ده بيتضاعف أضعاف مضاعفة فى ذى الحجة
رسولنا الحبيب صلى الله عليه وسلم قال :-
" يوم عرفة يكفر السنه الماضية والسنة القابلة "
جرب تعمل كمان حاجة مختلفة .. حاجة جميلة كدا تفتخر قدام ربنا إنك قدرت تعملها علشان ربنا يفرح بيك ويحبك وتكون من عبادة الصالحين ويدخلك الفردوس الأعلى
اللي حاسس إنه قصر في رمضان دي فُرصته ..
اللي حاسس إن في قلبه شىء من الفتور أو انتكاسة دي فرصته علشان يرجع بقلب سليم
هم 10 ايام بس مش كتير والله لكن عند الله أعظم وأفضل أيام فى السنة كلها .
طيب هعمل إيه علشان أنال الثواب العظيم دة ؟
1 - صيام هذة الأيام و إن لم تستطع فلا تحرم نفسك من صيام يوم عرفة ولا تحرم نفسك من ثوابها
2 - قراءة وِرد يومي ثابت و لو حتى صفحه واحدة .. بس إنت تقدر تختم القرآن فيهم زى ما كنت بتختم فى رمضان بالظبط .. لو قرآت كل يوم 3 أجزاء هتختمه .. قسمهم على الصلوات الخمس وقبل وبعد كل صلاة إقرأ وإنت مش هتحس بتعب فى قراءتهم + أذكار الصباح بعد الفجر .. وأذكار المساء بعد العصر
3 - الصلاة على أوقاتها الأذان يأذن على طول اتوضى وانزل على المسجد وصلي
4 - الدعاء بين الأذان و الاقامه " سنه مهجورة " حافظ عليها
5 - صلاة الضحى من ركعتان لـ 8 ركعات و أفضلهم انك تصلي 4 ركعات ( براحتك يعني ) و دي معادها من بعد الشروق بربع ساعة لـ قبل الظهر بربع ساعه
6 - كل يوم تفرح قلب مسلم .. " والدتك _ اختك _اخوك _ والدك _ او حتى حد متعرفوش بأبتسامة أو بدعوة بظهر الغيب " وصل أرحامك
7 - جدد نيتك في أي عمل أنه لله فقط + حافظ على أذكار ما بعد الصلاة .. { سبحان الله _ الحمد لله _ الله اكبر .. كل ذكر 33 مرة } دى مش هتاخد وقت وأختم بالمئة { لا إله الا الله وحده لا شريك له له الملك وله الحمد يحيى ويميت وهو على كل شئ قرير } + قراءة آيه الكرسى بعد كل صلاة
8 - القيام القيام القيام و لو بركعتين لو صليت بـ 10 ايات لم تكتب من الغافلين و لو صليت بـ 100 آيه تكتب من القانتين " صدقني مش كتير الـ 100 آيه " سورة الواقعه فى ركعة و سورة الأخلاص فى ركعة هيبقوا 100 آيه
9 - مهما بتعمل ذنوب و مهما غلطت فى حق الله إياك تسيب ركعة الوتر ، حافظ كل يوم على الوتر و هي ركعه واحدة بتختم بيها صلواتك في اليوم
10 - السنن الي بعد الفروض دى !
بص هم 2 قبل الفجر و 4 قبل الظهر و 2 بعده و 2 بعد المغرب و 2 بعد العشاء "
كدا 12 و دى أجرها بيت فى الجنة
11 - الدعوة بظهر الغيب لـ أي شخص ييجي فى بالك و لك مثلها يوميا عند الأفطار
12 - الصدقة حاول تطلع صدقة فى الأيام دى والله والله أيام ممكن متتعوضش تانى وهنندم عليها .. طلع باللى تقدر علية
كفاية دول
علو الهمه ، اللى ملحقش رمضان و ندم ، رمضان كانت الشياطين مصفدة دلوقتى العمل هيبقى ضعف أجره و معاه كمان جهاد النفس ، الأيام دى اللي هتثبتلك حالك بجد و التزامك بينك و بين نفسك بجد ، جهاد نفسك هيكون قوي بس مش ببلاش !
#أستقبلوهم_بتوبة_صادقة
#أجتهدوا_فى_هذة_الأيام_العشر
#أفضل_أيام_الدنيا
878 viewsMoнαмed Elαwαwɴι, 09:32
𝗘
