لما بشوف الناس اللي بتشتكي من زن العيال و دوشتهم و شقاوتهم | أكاديمية المسلم الصغير للتحفيظ والتربية ♥️

لما بشوف الناس اللي بتشتكي من زن العيال و دوشتهم و شقاوتهم

بفتكر كلمة قالهالي دكتور احمد خالد توفيق عن الاطفال :

الجري وراهم احسن من الجري بيهم

اللي عنده طفل سليم معافى مهما زن و مهما جري وراه و هو جوة بيته يصلي ركعتين شكر و يحمد ربنا كتير

افتكر إن فيه ناس مقضية عمرها تجري بيهم عالسكك بين المستشفيات

وفيه ناس بتدفن عيالها بإيدها وتروح البيت تندبح بسكين الذكريات

فيه أمهات بطلات مجاهدات بتجري بإبنها اللي عنده اعاقة خصوصا الاعاقة الذهنية اللي مايعرفهاش ولا بيضحكلها ولا بيكلمها و رغم دا ماسكة فيه و مابتطيقش عليه الهوا ولا تتمنى ترتاح من تعبها معاه لإن عندهم أسمى شعور انساني في الكون...

عشت عشر سنين في وسط الأمهات دي

منهم أم ما انساش كلمتها بعد ما ابنها "المُبتلى ذهنيا"وصل تلاتين سنة و هي لسة بتجري بيه و تقول :

طب بس يضحكلي ضحكة واحدة قبل ما أموت..

طب يعرفني بس و يعرف اني عشت جنبه و ماسيبتوش ..

طب ما يضحكش بس ربنا يمد في عمري عشان ما اسيبهوش لحد يبهدله بعد ما اموت

لو ابنك في حضنك و بيبتسملك و بتتكلم معاه بس تاعبك و مغلبك و مجريك وراه ، احمد ربنا كتير انك مش بتجري بيه

افهم انك في نعمة كبيرة قوي تستحق الشكر الوفير

محمود أبو العزم