#يبو_فاضل شهم يلما عز عليهم روحه يمه وازي حسين بس بجروحه يبني | قصائد سيد فاقد الموسوي المكتوبة والصوتية

#يبو_فاضل

شهم يلما عز عليهم روحه
يمه وازي حسين بس بجروحه
يبني موت بكيف زينب من تموت
لا يعطلك غير درب الروحه

طيح.. يم زينب نهر
موت.. بس ارجع گمر
ليل.. بعيون السهر.. يبو فاضل ..

نار.. عدوانك حطب
خير.. چفك للطلب
ماي.. گلبك ماشرب.. يبو فاضل ..

يبو فاضل .. يبو فاضل ...
ـــــــــــــــــــــــــــــــــــــــــــــــــــــــ

طيح ياكسرت گلبنه وضيمه
موش گبل حسين گبل الخيمة
موت عطشان الگمر كلش عزيز
غصباً اعله الغيمة فوگ الغيمة

كون.. لو طاح العلم
دير.. عينك للخيم
موت.. بس غطي السهم.. يبو فاضل

صيح.. يل صوتك عله
جيل.. اعبر بالهله
طيح.. خظر كربلا.. يبو فاضل ..

يبو فاضل .. يبو فاضل ...
ـــــــــــــــــــــــــــــــــــــــــــــــــــــــ

امسح ارواح التجيك ايامها
واعبر لباچر وطب لحلامها
يبني كون اتيه روس الگابلوك
وتركب اعله اجسام موش اجسامها

حيف.. زينب تنهضم
فوت.. بيهم للعظم
سيف.. عل دم ينفطم.. يبو فاضل ..

زود.. رفرف رايتك
صوت.. زينب صاحتك
ماي.. عدنا بگصتك.. يبو فاضل ..

يبو فاضل .. يبو فاضل ...
ـــــــــــــــــــــــــــــــــــــــــــــــــــــــ

انت اول موت بي هنيالي
تعب يسوى مو تعب من تالي
انت غالي بحضني مو يم الحسين
غاد مااگول اعله واحد غالي

صول.. يالچنك علي
غاد.. بس حسين الي
روح.. يافدوت هلي.. يبو فاضل ..

شيل.. بعيونك دمه
صيح.. فدوة لفاطمة
عيش.. گمرة بكل سمه.. يبو فاضل ..

يبو فاضل .. يبو فاضل ...
ـــــــــــــــــــــــــــــــــــــــــــــــــــــــ

يبني كون بسهم تفتح عينك
مااريد اختك تگلك وينك
الراية والخيمة اذا طاحن تطيح
وماتطيح الا وره چفينك

صوت.. سيفك يعتلي
صيح.. ردلكم علي
موت.. يتعادل هلي.. يبو فاضل ..

نار.. راسك يل گمر
صار.. بالماي الاثر
سيف.. بيدك النهر.. يبو فاضل ..

يبو فاضل .. يبو فاضل ...
ـــــــــــــــــــــــــــــــــــــــــــــــــــــــ
✿ اداء : سيد فاقد الموسوي
✿ الشاعر : حمزة الحسناوي
✿تليگرام : قصائد سيد فاقد الموسوي المكتوبة
@facdy