الثانوية مجرد مرحلة من مراحل كتير مستنياك.. سواء جيبت مجموع كب | دفعة التابلت ما بعد الثانوية
الثانوية مجرد مرحلة من مراحل كتير مستنياك.. سواء جيبت مجموع كبير أو صغير أو حتى في بعض المواد ماوفقتش فيها ف سيبك من اللي فات وركز في الجاي
الخطوة الجاية اللي هتعملها إن شاء اللَّه هي إنك تشوف كل الكليات اللي ممكن تناسب مجموعك وتبدأ تدرسها، تعمل search حلو عن الكليات دي وتبدأ تقارن مابينها ومابين مواد الدراسة فيها، تسأل طلبة من داخل الكليات دي وتستفسر عنها اكتر. اوعى تختار كلية حسب رأي غيرك، او تحت مسمى الكلية دي أفضل من الكلية دي! الواقع العملي انت الوحيد اللي هتشوفه فأرجوك لما تيجي تختار أختار بنائاً على بحث عميق في كل كلية هتفكر فيها سواء دخلت الكلية اللي نفسك فيها او دخلت كلية تانية ف دا مش عائق ابداً قدام تعلمك للمجال اللي نفسك تتعلمه.
ليه مجموع يحددلي المجال اللي انا نفسي أتعلمه ما دمت أقدر أتعلم اي مجال نفسي فيه من على النت عادي ؟ العالم دلوقتي مفتوح، وكل المجالات موجودة على النت، تقدر تتعلم اي حاجة نفسك تتعلمها أونلاين بل وتاخد فيها شهادات تشتغل بيها. العالم الرقمي مليان مهارات تقدر تتعلمها وتشتغل بيها بعد كدا فري لانس بعيداً عن الدراسة الأكاديمية التقليدية.
ممكن برضو تتعلم مهارات جديدة تفيدك في سوق العمل زي إنك تتعلم إنجليزي مثلاً وتتعلم Presentation Skills و PFA و ICDL و HR و Marketing و Design و Photoshop .. إلخ تدخل في Civil Work وأعمال تطوعية تزود بيها ال CV بتاعك عشان لو قدمت على اي شغل او منحة. تفتح مشروع صغير خاص بيك لعل وعسى المشروع دا يكبر بعد كدا ويبقى استثمار. ومش شرط يكون حاجة تقليدية زي محل او مطعم، وارد المشروع دا يكون إنك بتعرف ترسم مثلاً فتعمل صفحة على فيسبوك ويجيلك اوردرات رسم. او إنك تكون موهوب في الأشغال اليدوية ف تستفاد من موهبتك دي وتبيع لمحلات. او إنك تكون مصمم جرافيك شاطر ف تقدم على مواقع الفري لانس ويجيلك اوردرات. او إنك تكون مبرمج شاطر ف تعمل نفس الموضوع. وغيرهم كتير صدقني وانت اللي بتكتشف دا في نفسك مع الوقت ومع تجربتك لمجالات كتير.
الحياة واسعة وكبيرة ومش مقتصرة بس على الدراسة الأكاديمية التقليدية دي يا صاحبي. الحياة مش ثانوية عامة بس، الحياة مش كلية بس وعمر ما الاتنين دول ما كانوا بيحددولك مستقبلك!
مستقبلك ربنا هو اللي بيحدده مع إجتهادك. ف قرب من ربنا واستعن بيه وأجتهد وإن شاء اللَّه ربنا هيرزقك بكل خير.
الثانوية مجرد مرحلة من مراحل حياتك، وانت كنت بطل وعديتها الحمدلله لسه فيه مراحل كتير مستنياك يا صاحبي.
