'لو جايب 60% في الثانوية' طبعا بعد مبروك لكل أوائل الثانوية ال | دفعة التابلت ما بعد الثانوية
"لو جايب 60% في الثانوية" طبعا بعد مبروك لكل أوائل الثانوية العامة ولكل اللي جاب المجموع اللي كان بيحلم بيه دول مبسوطين الحمدلله مالناش دعوة بيهم كلامي دلوقتي للي اجتهد وعمل اللي عليه ولقى نفسه جايب خمسين وستين في المائة مايعرفش ازاي خد بالك ان الثانوية العامة السنة دي عبارة عن مثال مصغر للي كلنا بنتعرضله في الدنيا بشكل طبيعي.. المشكلة بس انه حصل معاك بدري شوية. فمعلش حاول تستوعب الموضوع عشان تقدر تكمل معانا الفترة الجاية الفترة الجاية هتشوف قد ايه في ناس بتتعب وتعمل اللي عليها وناس تانية بياكلوا التورتة على الجاهز هتشوف ناس بتحلم وتخطط وتبتكر وناس بتسرق الحلم دا بمنتهى السهولة كفاية انك تعرف ان ببساطة ممكن يكون حد جايب مجموع قد مجموعك مرتين مش عشان هو ذاكر اكتر منك لا خالص ابسلوتلي.. هو جاب المجموع دا عشان هو محترف للغش بالفطرة ودا مايمنعش ان فيه كتير متفوقين بمجهودهم، لكن انا حابب انك تعرف ان الدنيا بشكل عام مش عادلة زي ما انت متخيل خلاص دلوقتي انت كبرت وهتقابل ناس غير بابا وماما اللي لما بتعمل حاجة حلوة بيحبوك ولما بتعمل حاجة وحشة بيزعلوا منك اهلا بيك في الدنيا اللي ممكن تعمل حاجة حلوة ونزعل منك برضو.. وتعمل حاجة وحشة ونسقفلك عليها اهلا بيك في العالم النهاردة اللي وانت بتحاول انك تعمل اللي عليك هتلاقي اغلب الناس فيه عايشين عشان يتأكدوا انك مش قادر تعمل اللي عليك مش عايزك تفتكر الموضوع كئيب لا بالعكس خالص الموضوع بالنسبة لي ممتع جدا حياتي بقت عبارة عن مجموعة محاولات كلها سعي بشرف وبأخلاق لما تنجح محاولة فيهم بتبقى اقوى من مليون واحد اخد فرصة مش بتاعته ومش عارف يعمل بيها ايه سعيك وتعبك هو المطلوب منك والنتيجة دي بتاعة ربنا انك تفضل نضيف وتحب الخير للناس رغم كل اللي بتشوفه هو دا النجاح والثانوية العامة ماهي الا محاولة من مئات المحاولات اللي هتعملها في الدنيا فإوعى تيأس من اول محاولة
