2022-07-14 10:55:47
#موشح
النار شبت بالخيم يابطالها
أو ترست البيده الحرم وأطفالها
.
.
يا ليوث الحرب يسباع الرجال
النار شبت والخيم بيها الاطفال
أو طوّكتنه اجيوش بيديها الحبال
كوموا يشراس الوغى أو زلم الثكال
جتنه وادم مدري شنهي أشكالها
.
.
وين نشرد نار واسياط أو سيوف
أو من غبار الخيل ما كمنه نشوف
نريد ليكم والعده اعلينه تطوف
أظلمت وكت العصر كاع الطفوف
واحنه نسوه امچتلين ارجالها
.
.
الخيل تسحك والعده امكشره النياب
تركض اعله الحرم يليوث الحراب
لحكوا بينه يله نفضوه التراب
هاي وادم صوتها صوت الذياب
وارعبت كل النسا بحبالها
.
.
موش وكت النوم يا هاشم تره
اطفالكم تحت الخيول امكسره
صار زلمة الجان بالحومة مره
وأيده بالسوط بمتنه اموجره
اجيوش اجت تسبي النسا بسربالها
.
.
صفدونه أو كيدوا چفنه بحديد
أو شدوا الاطفال من ايدن لايد
أو كوطروا بينه عليكم جالعبيد
اجسادكم شفناها چواها الصعيد
زلم هاشم حيف هاي أحوالها
.
.
جدموا روس الهواشم عالرماح
والمصيبة الحادي يمها اعلينا صاح
واحنه مثل اطيور مكسورة الجناح
انريد نبجي لجن ممنوع النياح
روس هاشم رافكت چتالها
.
.
فاضل عباس الخزاعي
https://t.me/fadlkuzay
1.4K viewsedited 07:55