چیخیش ائدیر خلیل رضا فرمان فرضی ... ¤ اورنک‌سیز توپلوم، یاد | DUSUNCE / فرمان فرضی
چیخیش ائدیر خلیل رضا
فرمان فرضی
...
¤ اورنک‌سیز توپلوم، یاد قاپیلاردا دیدرگین دوشر. هر خالقین گووندیگی، ایناندیغی میللی-مدنی اورنک‌لری و اونجول‌لری وار. سون زامانلار باتی (غرب) مدیاسی‌نین، بیزلره و دونیا میلت‌لری غالب ائتدیگی و قالب ائتدیگی قوندارما سلبریتی‌لری، بیزی بیزلیک‌دن و اوزلوکدن اوزاق سالسا دا، بیز یئنه اوز اورمک‌لریمیزی تاپیب، اونلارا سیغینمالی، اونلارین گوستردیگی یولا و دوشونجه‌یه سیلاحلانمالی‌ییق.
¤ بیزیم بوگونوموز و صاباحیمیز اوچون ان واجیب، ان تمیز و ان دوزگون اورنک‌لرین و اونجول‌لرین بیری بویوک متفکر، محتشم عالیم و دویوشچو شاعیریمیز خلیل‌رضا اولوتورک‌دور. خلیلین سیماسیندا بوتون بیر وطن سئوگیسی آچیق آیدین پاریلداماقدادیر.
¤ خلیلین دوشونجه‌سینده بیر نئچه عوض اولماز و محتشم پرنسیپ وار، منیم دوشوندویوم قدر او پرنسیپ‌لر بونلاردان عبارت‌دیر:
︎ انسان بختور اولماق اوچون اونون مستقل وطنی اولمالی‌دیر، او مستقل وطن یاغی تاپداغیندان اوزاق، اجنبی باسقینیندان ایراق، صیرف میللتین سسی و اراده‌سی ایله یارانیب، یاشامالی‌دیر.
︎ مستقل وطن دوزلتمک اوچون، وطنداش ساوادلی، درین دوشونجه‌لی اولمالی و دونیا معاصر علم‌لرینه سیلاحلانمالی‌دیر.
︎ مستقل وطن دوزلتمک اوچون وطن اوغروندا چالیشانلار تمیز اولمالی‌دیرلار. تمیزلیک بیر دویوشچونون ان بویوک و ان گوجلو سیلاحی‌دیر و شخصی حیاتیندان توت گئت، تا اجتماعی و سیاسی حیاتینا قدر بو تمیزلیک گوزه چارپمالی‌دیر. وطنداش تمیزلیگه صیرف بیر اخلاقی فضیلت کیمی دئییل، بلکه بیر چیخیش یولو کیمی و بیر سیلاح کیمی اینانمالی‌دیر.
︎ مستقل وطن اوچون چالیشانلار ایناملی اولمالی‌دیرلار، و بو اینام اوزونو تانیماقدان، تاریخینی، کولتورونو درین دوشونمکدن، کئچمیش قهرمانلارینی تانییب عزیزله‌مک‌دن دوغولان بیر میللی اوز-گوون دن ایرلی گلیر.
︎ وطن اوغروندا دویوشن دویوشچو اوز خالقی ایله مهربان و اوز خالقینا عاشق اولمالی‌دیر. او اوز خالقینی آغ-قارایا، ساغ-سولا، اوزاق-یاخینا بولمه‌مه‌لی‌دیر. او اوز سلیقه‌سی ایله فرقلی اولان باجی-قارداشلارینی نفرت‌له، تهمت‌له و اخلاقسیزلیق‌لا ازمه‌مه‌لی‌دیر. بیر اصیل میلتچی، صیرف بیر جووقانی، بیر گروهو یا بیر نئچه یولداشی دییل، بلکه بوتون میللتی تمثیل ائتمه‌لی‌دیر.
#خلیل_رضا_اولوتورک
