2021-08-14 22:04:21
الدكتور أسامة بحديثو عن غشاء البكارة :
- قسمت الموضوع على شكل خرافات متل المصدر يلي جايب منو هالحكي:
الخرافة الأولى: غشاء البكارة يحمي المهبل.
فعلياً غشاء البكارة هو "بقايا نسيجية" وبيعتقد العلماء انو الغرض منو هو حماية المهبل بالمرحلة الجنينية من مصادر العدوى الخارجية متل الجراثيم والأوساخ. أما بالنسبة للمرأة البالغة فغشاء البكارة ما الو أي غرض فيزيولوجي أو طبي. فمتل ما قلنا هو مجرد بقايا نسيجية ناتجة عن تطور المهبل الجنيني.
الخرافة الثانية: غشاء البكارة بغطي المهبل بالكامل.
يمكن فكرة "الحفاظ على عذرية المرأة" اجت من الاعتقاد الخاطئ بأنو الغشاء بغطي فتحة المهبل بالكامل. وطبعاً هالفكرة خاطئة وبصراحة تسميتو بالغشاء خاطئة نسبياً، فهاد النسيج الو أشكال مختلفة، وطبياً الغشاء المغطي لفتحة المهبل بشكل كامل منعتبروا مشكلة طبية بتداخل مع الدورة الشهرية إضافة لصعوبة التبول، وهون منلجأ للتصحيح الجراحي.
الخرافة الثالثة: يكون غشاء البكارة "سليم" عند كل النساء.
غشاء البكارة بختلف بحجمو وشكلو ومظهرو. فعند البعض بشبه نصف القمر أو الهلال، وممكن يكون بشكل كعكة الدونات أو بشكل هامشي، وممكن يحوي ثقوب..
وحتى بعض النساء ما عندهن غشاء بكارة! (انتبه لهاد الموضوع عزيزي الذكر).
الخرافة الرابعة: يحدث ألم ونزف عند تمزق غشاء البكارة.
وهاد اعتقاد خاطئ نسبياً.. لأن مو كل النساء عندهن غشاء سميك، بعض النساء عندهن غشاء مرن سهل التمزق غير مؤلم وغير نازف..
وبدنا ننتبه لموضوع النزف، غشاء البكارة نسيج ذو تروية دموية ضعيفة فمنلاحظ عند بعض النساء انو ما بصير نزف نتيجة التمزق.
الخرافة الخامسة: غشاء البكارة بتمزق بعد الجماع الأول.
بالواقع، بمعظم الحالات منلاحظ انو غشاء البكارة ما بتمزق بأول جماع، ويمكن مصطلح "التمزق" غير مناسب لغشاء البكارة.. فالانسب انو نطلق مصطلح "التغيرات". ولازم نفهم انو غشاء البكارة ما بختفي بحدث واحد! فممكن يطرأ عليه تغيرات عديدة تدريجياً بأحداث قد لا يكون للجماع علاقة بها.
الخرافة السادسة: وجود غشاء البكارة دليل على عدم ممارسة الجنس بعد.
من اهم الخرافات المنتشرة بمجتمعنا.. بعد كل شي حكيناه من الواضح انو ما في اي علاقة بين غشاء البكارة وممارسة الجنس وما فينا نستخدمو ابداً كدليل على عدم الممارسة السابقة. فمتل ما قلنا غشاء البكارة بتبدل باستمرار لدى الأنثى بأحداث مختلفة والجماع مو هو الشي الوحيد يلي بغيرو، فممكن يتغير "يتمزق" خلال ممارسة الرياضة أو ببعض حوادث السقوط أو نتيجة الفحص النسائي أو الاستمناء التقليدي..etc وطبعا ما ننسى انو في نساء ما عندهن اصلاً هالغشاء..
يعني الأنثى يمكن توصل لليلة عرسها وهي مو عرفانة حالها (ولكم أن تتخيلوا كمية الخوف والتوتر يلي بصير عندها).
اخيراً خلينا نوجّه كلمتين للرجُل يلي رابط فكرة العذرية ببقايا نسيجية قد لا تكون موجودة أو قد لا تكون نازفة: مو دائماً لازم تاخد معلوماتك من أبوك وأمك.. الكل بغلط وأهلك كمان بغلطوا.. عدم وجود دليل على ماضيك ما بسمحلك تفتش بماضي شريكتك يلي قبلت تعيش معك كل عمرها.. وهلأ صرت تعرف انو اصلاً حتى الانثى ما عندا دليل على ماضيها! رجاءً خلي الثقة أهم من قطرة الدم.
كونوا بخير
#bma_med
#bma_psychiatry
المصدر:
https://hellodoctor.com.ph/sexual-wellness/what-is-the-purpose-of-the-hymen/?amp=1
232 views19:04