لو ولادك معرفوش هما مخلوقين ليه هتبقى مُفرّط كبير قوى، وهتلاقي | التربية الممتعة
لو ولادك معرفوش هما مخلوقين ليه هتبقى مُفرّط كبير قوى، وهتلاقي نفسك ضيّعت حياتك على الفاضي! هتلاقي إنّك بتربي في ناس بتاكل وتشرب وتتعلم وتسافر وتضحك وتتألم وتمرض وتموت بدون أي فايده! هتلاقي نفسك وقتك كله بتتعب فيه وتشقى وطالع عينك انت وأمهم في الانفاق والرعاية والسهر والصحيان بدري والمذاكرة والغسيل والشراء والفسح والدروس والمدرسة والذي منه، وبعديها تموت وهما لسه مش عارفين هما مخلوقين ليه؟! هو مخلوق علشان احنا نأكله ونشربه ونكبره وبعدين هو يتجوز ويأكل ولاده ويشربهم وبكبّرهم؟! مش ملاحظين إن فيه ناس كتير بتعمل كده! وممكن بعضهم يعمل شوية حركات كده يبان منها إنه بيعمل خير! فلازم وحتماً ولادك يعرفوا يصلوا ازاي وايه هو الحلال وايه هو الحرام؟! وإيه الفرق بين تعظيم بقرة الهندوس وتعظيم الكعبة المشرفة! وايه هو القضاء والقدر وهنتحاسب ازاي وإيه أصلاً اللي بعد الموت؟! وإن ربنا خلقنا للاختبار وجعل بعد الاختبار جنة أو نار؟! خلى للمتقين مكان جميل يليق بأعمالهم وجعل للكافرين مكان فظيع يليق بقسوة قلوبهم! لازم ولادك يعرفوا إن الأصل هو طاعة ربنا وإن كل حاجة حلوه في الدنيا بنستخدمها علشان نعرف نطيع ربنا بأحسن حاجة. ويعرفوا إن الصرمحة وقلة الأدب هتزول في يوم من الأيام وسيبقي حسابك في الآخرة سيتم وزنه يوم القيامة، إما مليء بالشر وإما مليء بالخير، علشان كده ربنا قال: "فمن يعمل مثقال ذرة خيراً يره ومن يعمل مثقال ذرة شراً يره" من غير ما تعلم ولادك كده فلازم تعرف إنك بعيد قوى قوى قوى، ولازم تلحق نفسك علشان هتتحاسب على الفرصة الجميلة اللي انت بتضيعها مع إنك بتتعب جامد علشانهم! (كلكم راعٍ وكلكم مسئول عن رعيته، فالرجل في بيته راعٍ ومسئول عن رعيته، والمرأة في بيتها راعٍ ومسئولة عن رعيتها). محمد سعد الأزهري
