إنك تطلع إنسان سوي وهادي .. أهم بكتير جدًا من إنك تطلع إنسان ن | التربية الممتعة
إنك تطلع إنسان سوي وهادي .. أهم بكتير جدًا من إنك تطلع إنسان ناجح ومجتهد لكن مضغوط ومش شايف قيمة للي بيعمله!
أكتر الأهالي بيشوفوا في ولادهم فرصة لتعويضهم عن إللي فات منهم، وبدافع الحرص والحب بيضغطوا على الولد إنه يكون ناجح عشان يطلع دكتور أو مهندس أو أيًا كان.
وكل دة طبعًا ليه مبرر عند الأهل إننا خايفين عليه وعلى مستقبله وحياته.
خليني أنقلك النُص التاني إللي أنت مش شايفه من الصورة، الطفل إللي بيتربى على الالتزام المطلق وغير مسموح بمساحة من الخطأ ، ومتطلبات عالية من الأهل، وآمال كبيرة في تحقيق طموحات الأهل حتى لو مش مناسبة إمكانيات الولد..ده بيكون بيئة خصبة تمامًا للأمراض النفسية وضعف الثقة بالنفس!
الطفل دة هو الواد إللي لما ميجيبش مجموع في ثانوية حتى لو اجتهد هيشوف إنه مالوش قيمة ويحس إن حياته انتهت.
الطفل ده هو إللي هيطلع مش قادر يحس بقيمة نفسه غير عن طريق المبالغة في الاجتهاد عشان يحسس إللي حواليه إنه كويس، فيفضل طول الوقت في صراع نفسي، ليه تحط ابنك في دة كله ؟!
أنا عارف والله إن الأهالي مش قصدها ونيتها خير لكن هقول تاني.. إنك تربي طفل سوي هادي وحاسس بقيمة وجوده وإنه محبوب دائمًا - ودة مش معناه إن مفيش عقاب -لكن مسموح بنسبة من الخطأ، ده أهم بكتير من تربية طفل مطيع مجتهد، لكن متوتر وقلوق وحاسس إنه مالوش لازمة، وفي النهاية المستقبل بإيد ربنا.
ولو ابنك هادي وراسي ومتربي كويس هيعرف يفكر ويوصل لحاجة كويسة فمتخليش رغبتك في تعويض إللي فات منك تيجي على حساب نفسية ابنك! محمد إبراهيم #التربية_الممتعة
