الصّباح وأنا طالع ماش على الموقف حق المواصلات، لاحظت قِدامي كا | مكتبتي℡ | 📖🇸🇩
الصّباح وأنا طالع ماش على الموقف حق المواصلات، لاحظت قِدامي كان في مجموعة الأطفال جزء منهم ماش على الروضة والتاني ماش المدرسة، ومن بينهم كان اتنين شكلهم كدا أخوان ولد وبت، بس اللفت انتباهي ليهم إنو لقيت البت ماشة وراء أخوها ومن بعيد شايفها بتخت يدها في رأسو، بس م كنت فاهم شئ ولمن قربت عليهم لقيت أنها شايلة مشط بتسرح ليو في شعرو وهو ماش! ضحكت شوية كدا، وقعدت أفكر ولحظتها اتذكرت كم موقف تاني قريب ليو.
وأبرزهم لمن كنت راجي صحبي في القهوة، وبعد ما اتصلت عليه قال لي لبست ملابسي وطالع عليك، بس اتأخر كتير ولمَّ رجعت ليو تاني عشان أعرف الحاصل قال لي والله بعد طلعت وقفتني أختي في الباب قالت لي أقلع قميصك المكرفس دا ما بتخجل مارق بيو كدا؟ شالتو وكوت القميص وبعدها لبستو وجيت عليك طوالي، ودا السبب الأخرني.
لحظتها اتذكرت العديد من المواقف، لكن كلها اجتمعت على إنو الأخوات هم البكونوا حريصات دائمًا وأبدًا على مظهر وشكل أخوهم، وبهتموا بالحاجات البنهملها نحن كرجال، وزي ما كان بتقول لي حبوبة "مستحيل أبو البنيات يطلع مبشتن" وفعلًا مستحيل العندو أخت ولا بت في يوم يتبهدل #أمين_عبدالماجد
