أتلاحكني انزل من رمحك وخر عيون الناس كلهه تصيح انجتفت زينب تمش | ديوان (في سبيلك) بشار السامي :شعر منبري
أتلاحكني انزل من رمحك وخر عيون الناس
كلهه تصيح انجتفت زينب تمشي ابلا عباس
لو اهددهم بسمك خويه يأشرولي على الراس
وينك ياعباس
.......... ١........
يأشرون عليه.. هاي المسبيه
وتحاجي الروس بدمعتهه
محدبه ومالومه. هاي المهضومه
الدنيه هواي متعبتهه
مجتوفه وراسك يلكافل يبرالي
واثار اسياط الذابحكم باطفالي
شافو طولي الناس بفكدك وخيالي... وخيالي
واحد فزع واحد خويه من طبيت السوك
واحد يشتم واحد اشر واحد لم طابوك
كل الكوفه تصيح هناكه ذيج الفوك النوك
وينك ياعباس
....... ٢...........
يحز وريدي. حبل البيدي
كل خطوه يرد يلجمني
كلش صعبه. عيون الغربه
من اتلفت تهدمني
لوطفل ايطيح من اطفالي يسحكونه
موماي اسياط الماترحم ينطونه
واليسكت كون على عنادي ايبجونه
ايبجونه
يسحك رجل رقيه الحاقد خاطر بسمي اتصيح
واحد گل الواحد طكهه بلكي هنانه اطيح
وانه اتميل بحالي الهزله ياخويه وي الريح
وينك ياعباس
. ........ ٣..........
بلا ريشاتك. ولانظراتك
ولافي طولك ويمينك
جنت بفصهه. وشوف بنصهه
شو هسه النبله بعينك
بطبول الناس اتلكتني بلكوفه
ونكرو من سمعو بت حيدر معروفه
هاي المحد شايف ظلهه مجتوفه... مجتوفه
وحد صاح خيالج هذه يازينب شفناه
وطولج للديوان مجتف زينب دخلناه
هاي هدوم حسينج زينب بلطف سلبناه
وينك ياعباس
........ ٤.........
وداعت خدري. تحير فكري
بحالي تشمت جتالك
شلون احميهم. وافزع ليهم
لو ظربو خويه اطفالك
من حرك امخيمنه وناره تحفينه
تجوي الكاع ومدري شصار برجلينه
صار الجلاد وجتالك حادينه
من ديره الديره ايجرونه والتهظم نسوان
وكباله الماي ابدونه الكاللهم عطشان
العاشت جوه جناح خوتهه هسه ابلايه خوان
وينك ياعباس
........... ٥...........
الكلبي الظامي. وجفي الدامي
صحتك خويه اتلاحكني
يظحك يمي. ويحرك دمي
جتالك مو تعبني
يكلي جفوف الكافل خدرج ماهيه
شو مجتوفه وفوك الناكه مسبيه
مثل امج ايدج بصفاحج محنيه
يذبحني السولف بلرايه وريشاتك والجود
رمح بنحرك سهم بعينك من فوكك عامود
عاتبتك خويه وعاذرتك وانه اعرف متعود
وينك ياعباس
..............
بشار السامي
