فوك الرمح خويه وتبعتك عباس دير العين لختك ميتات اديه ودمعي هما | ديوان (في سبيلك) بشار السامي :شعر منبري
فوك الرمح خويه وتبعتك
عباس دير العين لختك
ميتات اديه ودمعي همال
سويلي چاره الهاي الحبال
ياخويه
............ ١..........
من يمتى عباس الشمس تطلع على اوصافي
من يمتى راسك بلرمح والشمر متعافي
حفاي وتعرف الدرب شيسوي بلحافي
عباس صيح من الرمح بسكم ظرب كافي
صيح بهذاك بداعت حسين
گله ورم متن النساوين
ذاك البسوطه يطك الاطفال
سويلي چاره الهاي الحبال
ياخويه
........... ٢........
شتصير روحي الياكتر والله نشده بالي
كلهم يصيحولي سوه من السبي اطفالي
زينب انه بزودك جنت ينحلف بخيالي
هسه الي مايسوه وگف وتشمت بحالي
دور الرمح وانظر عليه
الحبل گاطع دم اديه
تلاحگني صرت بلايه كفال
سويلي چاره الهاي الحبال
ياخويه
..............٣...........
حيرت الطير ابلا جنح هيج اختك احتارت
وعبايتي من الارض ماتنعرف صارت
بين الاجانب هيبتي يابا الفضل سارت
عباس صارت تنشتم وين اختك اندارت
بدگ الطبول استقبلوني
بديوان بعدك دخلوني
انه الي محد شافلي خيال
سويلي چاره الهاي الحبال
ياخويه
........... ٤............
يلشايل ابرمحك گمر اوگف يشياله
گتله اقترب من الظعن مشتاكه اله عياله
يرتاح نزله من الرمح خل راسي ابداله
عباس جتفوني بحبل تستوعب الحاله
كل مااصيحن ياكفيلي
بس الصده مشيب يجيلي
ياهو اليعدل الحمل لومال
سويلي چاره الهاي الحبال
ياخويه
............ ٥............
ايد برجل ظهر بظهر ياخويه شدونه
خاطر نطيح على الوجه لمن يمشونه
يتقصدون من الظعن گاموا يطيحونه
يعزلون من عدنه الطفل خاطر يتيهونه
من الخرايب للخرايب
ظليت حرمه بلاكرايب
درب السبي عباس چتال
سويلي چاره الهاي الحبال
ياخويه
..................
بشار السامي
