قناة ملا غلام ابو محمد للشعر الحسيني

2022-07-29 14:57:18 يا لها مصيبة ابكت عين السماء :

جدم الشاهــدك مطروح ينشال
و يحگه اعليك دم العين ينشال
اشـلون الحطّمته الخـيل ينشال
المثلك چيـــف ينحـــط بالوطيّه

ملاغلام ابومحمد باز کردن / نظر دهید

2022-07-29 14:55:16 لسان حال امّ زهير مخاطبة ولدها :


ضحّيت بٱدماك الشــــرعها
لحسين و اخته الهل دمعها
فوگ الوجن و الطف فجعها
هنيالك الجـــــنّه و فـــرعها
اُمـــك تندبك و استــــمعها
سلّم علىٰ الكســــروا ضلعها

ملاغلام ابومحمد باز کردن / نظر دهید

2022-07-29 14:53:21 نعي في استنهاض الامام الحجة صلوات الله عليه

يا يوم تظــــهر يا وليــــنه
يا وارث اليـــوث العـــرينه
يٱبن النبي راعي الســـكينه
چا تنتهض يمته و تجـــينه
و تطلــــب ابثار الذابحــينه
و راسه اعلـه رمح امعلّگينه
و جسمه الحوافرهم رهينه
و ثار البطل حامـي الظعينه
و تطلع سهـمها الصاب عينه

ملاغلام ابومحمد باز کردن / نظر دهید

2022-07-29 14:49:50 زينب سلام الله عليها تتذكر المصائب التي مرّت عليها عند رؤية هلال محرم الحرام


لسان حالها :::

(نعي مجاريد)

ٱهلال المحرّم هل علينه
و تذكّرنه مصايبنه و سبينه
و اعله الثره ٱموذّر ولينه
عفناه غصبن مو بيدينه
و ندبناه بالله التفت لينه
ياللّي جبتنه من المدينه
من ٱدماك چم تربه خـذينه
لبونه و نخـبره الصار بينه
بلكي يگــوم النّه و يجينه
وايشـوف إبنه الذابحينه
و ظعـنه الأعادي اميسرينه
چا ظل يهـل دم جفن عينه


ملاغلام ابومحمد

@gholamabomhammab باز کردن / نظر دهید

2022-07-29 14:49:34 في هلال شهر محرم الحرام

وزن (فائزي)


شهر المحــــرم بالســـــّمه بيّن هلاله
و دم صبت اعيون المحب والضيم شاله

دم صبت اعيـون المحب لمصيبة حسين
امْصيبه الذي هزّت عرشها و بچّت الدين
وبيها ٱنفجع گلب الرسول و صار نصيين
و ونّ اعله سبطه المنـــذبح لجل الرساله

يبچي اعله سبطه الظل رميه اعله الترايب
و يبچي على انصاره و هله و ذيچ الغوالب
وايصيح كلـــفه امصيبتك بين المــصايب
مَرمُرت روحـــي و گلـــبي بس الضــيم ناله

مرمرت روحي و ضـــامري گطـعت ابتــوته
وسيف الكــــفر صابك تره ابغـدره و لهـوته
و يومٍ طـحت جبريل ونّ و اسمعت صوته
و ضجّـــت عليــك امـــلاكها و الــدمع ساله

ضجّت عليـــك املاكها و ضــجّة سماها
من غسّلك دمّــــك يبن حـــامي حــماها
تدري المصيبه الفـــادحه الـزينب تراهــا
يومٍ مشت مسبيه من عگــب الجـــلاله

يومٍ مشت ويه الـعـــده فوگ الهزيله
و عافتها كلـــها امطرحه ذيچ الجبيله
و عگـــب الگمر لظعونها صارت كفيله
ينزف دمعها و للسبـــط تجمــع اعياله

تجــــمع اعياله و تنتخي ابحامي الحميه
و بلّلت بالمـــدمع بوادي الغاضـــريه
لآچن لَمَــــن شافت أُخوها اعـله الوطيه
لطمت وجهها واصرخت ويلي اعله حاله

لطمت وجهها و ٱصرخت و حسين مــذبوح
و ذبّت على الراس الترب و امدوهنه الروح
مـــرّه ٱتْعَتِب مــرّه تحــنّ و تبچـي و اتنوح
و بچّت تره طيــــور السّمه ابذيچ الــمقاله


ملاغلام ابومحمد
الكورة الولائية

@gholamabomhammab باز کردن / نظر دهید

2022-07-29 14:48:56 في دخول شهر المحرّم الحرام


(شهر العقيله الإجـــــه ياعيـني دم سيلي)
حگها ابألمها و تحـــن مهظـــومه يا ويلي
تندب يبن والـــــــدي چيف ارقـــد ابليلي
و انت اعلـه حـر الثره يالهـــــدّمت حيلي
راح الفــــرح و الرجه و مـاتت تآويلــي
و شفتك طريح الترب و اتصيــــح فيّيلي
ما عندي خيمه و عبه و اعله الثره اكفيلي
وبين الأعــــادي خيم يا هــو اللي يبنيلي


مرّه اندب يخـوتي و نوب يبناي
وگع ذاك الذي من الوطن يبناي
يا هــــو اخيام بين اعداك يبناي
الــــي و لٱعيالكم هــاي المسيّه


ملاغلام ابومحمد البوغبيش

@gholamabomhammab باز کردن / نظر دهید

2022-06-11 22:52:42 يا ضامن الجــنّه اشحچت بيك الناس
و تطگ عين الشمس يا سيدي ٱنوارك
يا دار ٱلأمـــــان الخائف ٱمّــــن بيـــك
و حــــزن أيّوب خلّص من وصل دارك
شرب من بير جــودك ألف حاتم ، ماي
و وگــــد جمر القِرىٰ و شبّاها من نارك
و صــفّت بالمــدح يم بابه كود احلوگ
و ٱصـل الجـــــود إنت و جاريه ٱنهارك
يعني ٱهل الكــــرم كلما يجيـها الضيف
تگــــــول الضــيف و المضياف خطّارك
و انت اصل الحياة ٱصل النِعَم و الدين
الفاهــــــم عاف كل شي و حبّاً ٱختارك
و ٱدري ٱگبال شخصك شني الجنّه اتصير
و عتـــبار الجــــــنان ابصــيت عتبارك
و لو تدري الخلايق شنـو المعنىٰ البيك
علىٰ اتراب التسحگه اتگـــــــوم تتعارك
چم يعگـــــوب عاشـــگ ريحتك مولاي
و فتح عينه اعله عطرك سيّدي و زارك
الچانوا بالمهالك خـــــذوا مــــن ٱتراب
جــــدمك و اصبحـــوا حكّام باكتارك
البــــذلوا و الكلوا و الشبــعوا من الزاد
لون احلوگـــــهم من طبــــــخة اتقارك
الحچوا عن مبــدأك و الوضّحوا معناك
العـــرفوا مســتواك و عرفـــوا اسرارك
صارو لك فراشــــه و انت ورد التيـــن
و داروا بيك يا سيّـــدي من اصـــيارك
يدرونك وصيّه و خيطها مـــــن الروح
الربط وحي الجــــلاله ابمَعصم افكارك
و يدرونك نفــــس و استنشقاها الذات
و شخصــك بالرساله و روحـها اتشارك
و يم گـــبة الذهـــب تلگاها لهفه ٱرواح
و تطـــــوف اعليك مثـــل الطير زوّارك

ملاغلام ابومحمد البوغبيش

@gholamabomhammab باز کردن / نظر دهید

2022-05-26 00:36:49 عندما كان الامام الصادق عليه السلام في فراش المنيّة ٱلتفت الى أهله و الى ٱبنه الامام الكاظم عليه السلام فرآه باكيّاً فقال له بلسان الحال:

يبني أشوفنــــكم تنوحون
و ٱگبال ٱبوكم هيچ تبچون
تدرون لٱبناتي تفجعــــون
و صواتهن تعله و تسمعـون
يا ريت يا بويه تهيــــدون
و لمصاب جدّي من تذكـرون
اتهون والله امصيبتي اتهون
و لعيوني بويه من تغمضون
إبچوا اعله ذاك المات محزون
بطفــوفها و عالترب مرهون
و محّد حضر غمّضله العيون
و عمّــــاتكم بالنوح تدرون
ظلّت تهل و اتسيل الجفون


إبسيل الدمع بويه انعرف جـدنه
و طريق النـوح للأحباب جــدنه
بچينه و ها ذكرنه امصاب جدنه
الغريب المــــات عالشاطي رميّه


ملاغلام ابومحمد باز کردن / نظر دهید

2022-05-26 00:36:45 في رثاء الامام الصادق عليه السلام:


على الصادق أون حد گطع الانفاس
عليه اشلــــون جارت بني العباس

بدر من هاشـــــم و بيت الرساله
و حفيد المصطفى راعي الجلاله
عليه دار الكــــفر و ٱهل الضلاله
مثل ما عالوصي دارت الأرجاس


عليه داروا مهـــــو بالســمـهريّه
ابحــطب و ابنار و ٱنواع الأذيه
مثل ما وجّــــــروا باب الــزچيه
و حدها وبيت ابوها انهان وانداس

داســـوها الـــحدود و شبــوا النار
على اعتاب الامام و نجل الاطهار
و طلع يطفي الجمر والدمع مدرار
و تذكّر كــربلاها و هَجْــمَة الناس

تذكّر كـــربله و صب الـــدمع دم
و تذكّـــر نارها و جـمر المـــخيّم
بچه و ناده و دليله ايفور مضرم
عطش ذبلت يوسفه وردة الياس

و بگه مهظوم وادمـوعه اعله خده
ينوح ويبچي بس يبچي اعله جده
و ٱثاري الطاغي المنصــــور ضده
تآمر و انتفـض معدوم الاحساس

تآمـــر و انتفض و ٱغـدر الميشوم
و صبّح صــــادق الأطهار مسموم
وغدت أرض المدينه ابنوح واهموم
وليهـــا من الأجل لمّن جـرع كاس

جرع كاس الأجـــل و الناس ٱجتّه
يويلي ابنــــوح و الــــهم شيّـــعتّه
بس حسين هاشــــــم محضــــرتّه
ظل مطروح و اختــه تلطم الراس

ملاغلام ابومحمد
@gholamabomhammab باز کردن / نظر دهید

2022-05-26 00:35:44 فلقد شيعت الناسُ الامامَ الصادق عليه السلام و ناحوا عليه و بكوا و اضجعوه في مثواه الاخير ، و لكن حرّ قلبي لمن بقي على واهجة الطف بلا غسل و لا كفن و لا دفن و اخته الحوراء تنادي: أما لهذا الغريب من مغسّل.


تموج اليوم ٱشوفنها المدينه
إبو الكاظــم أثاري امشيّعينه

المـــدينه اتمــــوج و الدنيا مغبره
و ٱشوف ٱعيون هاي الناس حمره
تراهـي مظلـــــمه الــــيال المزهره
و ٱظن روح العرش صبحت حزينه

حزين الكــــون و الـدنيا و سماها
أثاري الصــــادق اتوسّـــــد ثراها
ارفعــوها اجنازته و طلعت وراها
تنـــوح الـــــناس يا فگـدت ولينه

تنـــوح النـــاس من عظــم الرزيه
وغدت ظلمه السمه وظلمه الوطيّه
على الصــــــادق إمام الــــجعفريه
تســـيل و ما تجــف للمحب عينه

تسيل اعيــون هالناس اوي اهلها
الجنازه جاهزه و ٱحضــرت كــلها
و ندب صوت الموالي راح ٱمــلها
و غده صـــوب المــقابر شايلـينه

امــدلل شايلينه ٱهله و الاحباب
وصدگ خلو اباگــــبره و هالوا تراب
بس حسين ظل مرمي و الاصحاب
ضحايه و عالــرمح يزهــر جبينه


ملاغلام ابومحمد


@gholamabomhammab باز کردن / نظر دهید