٣ شهور بـ ٩٠ يوم قادرين يحولوك لإنسان جديد! بما إن باقي ٤ | Hope for paths of despair 💚

٣ شهور بـ ٩٠ يوم قادرين يحولوك لإنسان جديد!

بما إن باقي ٤ شهور والسنة تخلص فدي فرصة إنك تنقذ اللي باقي منها بخطة الـ ٩٠ يوم

خطتنا هتتقسم لـ ٥ جوانب.

١- جانب ديني.

وعندنا هدفين هما:

حفظ جزئين من القرآن (عم وتبارك أو سورة البقرة مثلًا).

متابعة سلسلة شهريا لشيخ محبب لقلبك عشان تشحن روحك.

٢- جانب تطويري.

- وده هيتقسم لـ ٣ حاجات:

قراءة ٦ كتب بمعدل كتابين في الشهر.

انهاء مستويين إنجليزي من تطبيق ذاميركان إنجلش.

تجربة مجال جديد شهريا مثلا الشهر الاول تجربة التسويق، التاني التصوير وهكذا.

٣- جانب صحي.

وبرضو عندنا هدفين

الوصول لـ منع السكر وده تدريجي.

ممارسة الرياضة لمدة 10 د يوميا وفيه كذا ابلكيشن موبيل بيساعد على دا.

٤- جانب نفسي.

مع صعوبة الأحداث حوالينا لازم تكون عندك خلفية نفسية كويسة جدا.

فمن ضمن الخطة إنك تاخد دورة فقة النفس ومع نفسي لـ د. عبد الرحمن ذاكر الهاشمي خلال ال ٣ شهور.

٥- الجانب الاجتماعي.

متضيعش حياتك أو فترة الجامعة من غير ما تشارك في عمل تطوعي.

أنزل روح مؤسسة موثوقة زي الهلال الأحمر أو رسالة واتطوع معاهم وشوف بعد ٣ شهور مهاراتك هتروح لحد فين.

= وعشان الخطة تتنفذ بأفضل شكل ممكن ومياخدكش حماس البدايات.

- عود نفسك تصحى الفجر عشان تصلي الفجر حاضر ويومك يكون طويل وتقدر تعمل فيه كل حاجة.

- أول ما تصحى لو قررت انك تمسك الموبيل ف مبروك عليك يوم جديد ضايع.

- استغل اول ٣ ساعات في اليوم في إنجاز مهامك من غير تشتيت السوشيل ميديا.

- الصلاة الصلاة الصلاة، لو مش منتظم أظن إن 90 يوم كافيين جدا أنهم يحولوك لشخص ملتزم بصلاتك، فخد قرار وانوي انك مش هتسيب فرض من النهاردة.

- شوف كل يوم فيديو تحفيزي يساعدك تكمل.

وبس كدا فالمطلوب منك يا عزيزي الإنسان إنك:

١- تجيب ورقة وقلم.

٢- تكتب الجوانب دي واهدافك الشخصية تحتها طبعا تقدر تغيير في الأهداف اللي فوق.

٣- تقسم المهام على كل شهر لوحده.

٤- تقسم الشهر على ٤ اسابيع وتقسم على كل اسبوع مهامه.

٥- تركز على الاسبوع اللي معاك وتنسى باقي الخطة وكل يوم جمعة تظبط الاسبوع الجديد وتقيم الاسبوع القديم وتكافئ نفسك.

لو نفذت الخطة دي فبعد ٩٠ يوم من دلوقتي هتشكر نفسك على حجم الانجاز.

وبس كدا اتمنى أكون قدرت أفيدكم.



#yaman