سَــــــــدَنْ ..🧚🏽‍♀💛!

2022-08-29 09:42:58 الطب كقراية اولا ثم مهنة

بوست طويييييل بمناسبة الكلام السلبي الكتير الحائم عن مهنة الطب

عايز امسك الجانب الاخر من المنهة

(عليك الله ما تخت تعليق سلبي
البوست ما نفع معاك اتجاوزه بس )

((اتمعطت من الكلام خليهو وامشي بس لانو قد ما تكون دي اللحظة المناسبة انك تقرأ كلام ذي ده ))

في اخوانا صغار ياداب في بداية الطريق عايزين يعرفوا الحاصل بالضبط

البوست بعبر عن رائي وتجربة صاحبه فقط قد لا يتناسب مع الكل

طيب
نبدا نقول بسم الله
كلنا متفقين انه قراية الطب ما ساهلة
ومحتاجة تعب واجتهاد وسهر
لكن الان الحمد اصبحت ميسرة اكتر ووسائل التعليم متاحة
مثلا لو في موضوع ما فهمته ممكن تفتح اليوتيوب تلقى زول شارحه بطريقة مبسطة يفهمك
في حاجات اون لاين وهكذا
الحاجات دي ساعدت الناس شوية لكن ما يزال الطب صعب ومحتاج اجتهاد

العدو الأكبر للناس في ايام الدراسة قبل وبعد الجامعة الاسترس والتنشنة حاول ابعد بقدر الإمكان من الاسترس في النهاية انت زول بتحضر محاضراتك والراوندات ومع شوية قراية بتعدي وبتنجح نجحت ب C ولا A صدقني ما بتحتاج التنشنة دي كلها
اقرأ واجتهد لكن ما تتنشن
وما تضغط روحك نفسيا اكتر من اللازم
خت في بالك انا حاقرا عشان اجيب معدل عالي لكن في النهاية لو جبت باص بس برضو الحمد لله
لانو صدقني بعد تتخرج مافي زول بعاين لتفاصيل شهادتك الجامعية
كنت بتجيب كم ايام الجامعة

اذا من ناحية قراية:

اقرأ واجتهد بدون ضغط نفسي وبدون ما تقارن نفسك بزول وبدون ما تنبهر بزول وتقول ده عرف المعلومات دي متين وكيف وانا متين ابقى ذي فلان
كلها مسألة زمن وحتبقى ذي فلان واحسن من ناس كتار كنت شايفهم بعااااد شديد

احضر المحاضرات
العملي
اقرا من بداية السنة لو البسيط
ما تضيع زمنك في السوشيال الميديا والنقاشات البيزنطية المامفيدة
نقطة مهمة
وانت لسة طالب ماتشغل نفسك كتير بما بعد الجامعة
قصدي المسار المهني
ركز في حاجات الجامعة وظبط قرايتك
حاول ظبط ليك لغة
بتعمل فرق كبير بعدين
ايام اجازات الجامعة او بعد الجامعة مباشرة طور لغتك الإنجليزية
ماحلوة بعدين تكون زول سنير ولغتك الإنجليزية ركيكة لمن تقدم كيس تضرس السامع
الموضوع بقى ساهل
ممكن من اليوتيوب ده تظبط لغتك

وبمناسبة تعلم اللغة الإنجليزية من اليوتيوب دي احكي ليكم قصة ملهمة شوية
مرة ركبت مع بتاع تاكسي من مطار دبي لأبوظبي
ولد شاب من بنغلاديش
المشوار طويل فبدينا نتونس
لاحظت لغته الإنجليزية ممتازة جدا جدا
قلت ليه ماشاءالله لغتك الإنجليزية ممتازة تعلمتها وين
قال لي انا درست في بنغلاديش لحدي الثانوي وجيت دبي قبل ٧ سنة كعامل نضافة في مطار دبي وكنت بأخد مرتب ٧٠٠ درهم
كنت بدفع منها ٥٠٠ درهم في النت بتعلم إنجليزي من اليوتيوب و ٢٠٠ درهم بمشي بيها حالي
في خلال سنتين قدرت اتقن الإنجليزي تماما وطلعت رخصة قيادة لكن ما وفرت ولا درهم
فتحت وظائف في تاكسي دبي مشيت طوالي قدمت اول ما شافوني بتكلم إنجليزي بطلاقة وعندي رخصة اخدوني على طول وكان الرتب الفين ونص درهم بالإضافة للبونص الباخدو بعد افوت التارقت
بديت اجمع اشتريت عربية خاصة
بقيت اي زبون الاقيهو بديهو رقمي الخاص بقول ليهو انا بعد دوامي ينتهي شغال بعربيتي الخاصة ممكن تضرب لي اذا عندك مشوار
الناس بتفضل تتعامل معاهو عشان لغته كويسة ولطيف
قال لي اغلب زبائيني خواجات واسيوين وسودانين بعد اخلص دوام التاكسي بشتغل بعربيتي
قال لي قدرت اعمل قروش الحمد لله
وراني بيته في بنغلاديش فيلا ماشاءالله وراف فور اخر موديل وبدفع لأخوانه رسوم الجامعات ووضعه في بلدو ظابط عديل ماشاءالله ولسة شغال

نستفيد من القصة دي انو الإنجليزي ممكن تظبطو من النت
وانك لو عندك قريشات اخسر في نفسك طورها اعمل شهادات حترجعن بسرعة وتساعد نفسك واهلك.

طيب نجي لما بعد الجامعة
الطب الان هو من اكتر المهن المجدية
واغلب الناس بتلقى شغل بعد تتخرج حسب مرحلتك الانت فيها

ايوا صحيح الوضع ضاغط بس لكن ده الوضع العام في اغلب المهن وعلى الاقل انت عندك امل ممكن تتخارج ممكن تشتغل برايفت ممكن تتخصص ممكن اذا امكانياتك كويسة تعمل مركزك براك وهكذا
المهم في امل وصابر على وضع البلد عندك هدف عايز تحققو سوا كان خبرة او تخصص او دراسات عليا وهكذا

اذا بتقدر تتخارج بدري ظبط نفسك واتخارج خصوصا اذا في زول ممكن يساعدك من اهلك امك ابوك اخوك شيل منو امتحن طور نفسك بعدين بترجعها اضعاف
ظروفك ما بتسمح ليك تمرق اتخصص في بلدك ده
ظروفك ما بتسمح ليك تتخصص اغترب طبيب عمومي صلح وضعك ووضع اهلك ومتى ما اتسهلت ليك اتخصص

حوجتك بسيطة ودايرة حاجة تسندك لامتحانات وكده اضرب الولايات والخلا بنقل شوية وتعال امتحن

اذا في كل الأحوال الطب ممكن تدخل منو و
Soon or later
حتغير وضعك ووضع اهلك باز کردن / نظر دهید