2022-08-16 23:24:39
محرررم 1444هـ السيدة رقية والسيدة سكينة ع
ذولي اهلنه . گومي سكنه . خل نلمهم
آنه وانتي . يلله يختي . خل نظمهم
ذاكى راس او هذي إيد . بيها اشم ريحة عضيد
خل نلمهم
طلعن خوات ابحسره . من خيمة صارت جمره . او ركضن سوية
هاي انچوت رجليها . هاي الجمر بيديها . او تصرخ إدية
ارقية وگعت سكنه شالتها ابحمية
اتگلها يختي اتچي يرقية عليــــــة
امحرگات ايدية چا شلتچ بديـــــة
يختي كلها اجروح گاع الغاضريــة
خل ندور . بلكي ننظر . خيمة وحده
بيها نگعد . اجروحچ انشد . يحله ورده
امنيلنه امخيم جديد . بيها اشم ريحة عضيد
خل نلمهم
_____
گعدن سوه بالحومه . إخت او إخت مهضومه . وشافن أهلهن
شافت نحر لزغيره . او شافت جسد لچبيره . او راس ابحظنهن
صاحت ارقية يسكنه خل نلمـــــهم
ذولي اهلنه واحنه بس هالليلة يمهم
آنه الم ابروسهم وانتي ابجسمهـــم
او شمة اوداع او سفر خلي نشمهم
سكنه ضمي . من تلمي . ذكرى حلوه
من اخونه . من ابونه . كلشي نهوى
بيها نرتاح ونهيد . بيه اشم ريحة عضيد
خل نلمهم
_____
شافن جسد متوذر . او راس الرقية ينظر . مشبوحه عينه
راس الأبو عرفته . ركضت عليه حضنته . بس جسمه وينه
گعدت اتلملم رقية ابجسم ابوهـــــا
لمت اضلوعه ابحصيره او طشروها
ضمت اچفوفة ابعباها وطيحوها
اتلمه وايگطعونه أكثر حيروهــــــــا
صاحت إحسين . بويه لي وين . أبقى المك
تعبن اچلاي . صاير اهواي . بويه جسمك
أمشي لو شيلك تريد . بيه اشم ريحة عضيد
خل نلمهم
___العمهن سوية ركضن . يم چفه الايمن گعدن . وشبگن جربته
ظلت تصيح اسكينه . ما بيه اصد العينه . اتعب نبلته
لمت اسكينه ابجسم عمها ابمدامــــع
او چفه الايسر دورته وين واگـــــــــع
إبن الطفيل اهناك حتى ازنوده گاطـع
حتى عينه اويه السهم من عنده شالع
بحله راية . اتلم ثناية . عمها عباس
احتارت اشلون . اتلم العيون . ويه هالراس
اتلمه واجروحه تزيد . بيه اشم ريحة عضيد
ذولي اهلنه
_____
العبدالله اخوهن وصلن . بس نبلته ما شلعن . خافن تألمه
باسن خواته الرگبة . او دورله ماي ايشربة . بس ماكو يمه
ارقية صاحت بالحظن يختي ارد اخليه
حتى لو ميت يسكنه أرد اناغيـــــــــــــه
ياسكينه بعمامة أبونه خل نغطيـــــــــــه
عن الرباب او عالعقيلة يختي ضميـــــه
رگبته ابلون . دم اخو ام عون . يختي شوفيه
اشگد حلو چان . او هسه غرگان . يختي شيليه
الدنيته يرجع بعيد . بيه اشم ريحة عضيد
ذولي اهلنه
_____
وصلن يويلي الجاسم . حنَنَه بس ظل نايم . او شعلن شمعته
واتمددن وي لاكبر . اتشيله الإخت ما تگدر . ثگلانه جثته
إنتهن من كل اهلهن واستعــــــــدن
للسبي او فوگ الهزل راحن يصعدن
عالرؤؤس او عالرمح گامن يصـــدن
الكربله اهنا يم اهلهن ما يــــــــردن
ابصوت الحنيّن . صاحن إحسين . الله وياك
بويه بالشام . بدمعة وآلام . نلتقي اهناك
ابكربله باقي وحيد . بيه اشم ريحة عضيد
ذولي اهلنه
حيدر الحلفي
495 views20:24