علي الأكبر وكأن اشبههم وجهاً برسول الله يا علي يوليدي | الشاعر حيدر حسين الگرعاوي
علي الأكبر
وكأن اشبههم وجهاً برسول الله
يا علي يوليدي يمه وجهك عيدي
******
بالـي يمــك وانت كلشــي ابالي
يمـــه ما ينحمــل موت الغالــي
النــــار يحركَهــا جمــر دلالــــي
ألـــف مرة لــو متت هنيـــــالي
وجهي ألطمه بأيدي يمه وجهك عيدي
******
يبني مو دمعـــات حركَــن عيني
بيــدي من امسحـــهن تجوينــي
مـدري ألمـــن بعـــدك تخلينــــي
إدعــي من الله صبـــر ينطينـــي
بدي باچـــر كَيدي يمه وجهك عيدي
******
آنــــه ألمـــن يالولـــــد ربيتـــك
سنين من عمري شلت وأنطيتك
شكَد أحَســـب وأشــكر تانيتــــك
وحــــدك لحظــــات ما خليتــــك
تمشــي وي وريــدي يمه وجهك عيدي
******
تروح امـــــك وين متعوفـــــها
تمــوت راح وراح ييبس شوفهـا
يالچنـــت كلســا تبوس چفوفــها
يشيب راسك يمــه من تشوفهــا
روحي بســچ هيدي يمه وجهك عيدي
******
من يجـــن الليل ياخذ حيــــلي
الله ليـراوي العــــالم ليلــــي
قاســي بس كَــام شكثر يبجيلي
عليــك الله كون أموت أدعيلــي
يا مصــايب زيدي يمه وجهك عيدي
******
يالچنت عالنـــاس بيك أتبــاها
أحلــى من يوسف ولد أنطـــاها
ليش أمــك يالـــولد تنســــــاها
تروح وتعــوف القهــر ويـــاها
هالبقيت وحيــــدي يمه وجهك عيدي
******
بروحـــي يوميــه أسوي قراية
والمصـايب والحـــزن مشــــاية
يلطـــم عليــــك الدمـــع ويـــايه
حيلــي ميت والجــــروح هوايــة
وآنه يبنـي شبيدي يمه وجهك عيدي
******
حيدر حسين الكَرعاوي
