الرضيع شكبرها النبله البنَحرك أطول يـّمه من عمــرك عسن | الشاعر حيدر حسين الگرعاوي

الرضيع



شكبرها النبله البنَحرك

أطول يـّمه من عمــرك

عسن كون أنكَطع نحري        يعبدالله أخـذ عمري

*******

يا يمــه الولــد ما ينشبـع منه

من يغيب وجهك بيمـن أتهنــه

جنـت مهدك أبـد ما أبتعد عنـه

كون بسهم نحرك وجهي ألطمنه

يبعــدالله شينسيني       بعد ما أشوفك بعيني

أموتن يالولد تدري       يعبدالله أخـذ عمري

*******

أتاني سـاعة ساعــة يالولد تكبر

أغمض عيني عنك لحظة ما أكَدر

بحضني يالــولد أشتــاكَلك أكــثر  

ما ترحم ييمـــه كَلبـــي المَــرمَـر  

الُأم يبنــي شيهودها         أبنها أغلـى ما عدها

يبني ردتـــك لكبــري       يعبــدالله أخـذ عمـري

*******  

أنسـه همومي كلها والقهر والهم

بحضنـي من أشوفك يمه تتبسم

النهار بعينـي عبدالله انكَلب أظلم

يبني المـــاي من يتبــده ما يلتم

جنت تضحكلي من غبشه      ييمــه تمَوت الوحشه

راح وياك كل صبــري      يعبــدالله أخـذ عمري

*******  

حضني شكَــد يحبك ليش خليتــه  

شكثر ناداك كَلبـي وأنت ما جيته

بس القــهر يبنــي عليـه وديتـــه  

كلشـي بروحي يمــه عليك بجيته

شيشيلك يبني من بالي      تِمَـوت فركَـة الغالي

سهمك ما أجه بصدري      يعبدالله أخـذ عمري

******      

خلصت روحي يبني وما خلص حزني

جــم يعقــوب ينحب لو سمــع ونــي

كل ســاعة أموتن من غبـــت عنــي

يعبــد الله الليـــالــي شكـــثر بجنـــي

أبجـي ودمعي يبجيلي       امـوت ويــاك أدعيلـي

بعد ما ينجبر كســري       يعبدالله أخـذ عمــري

*******

ست أشهر ييمــه أشفت من عمرك  

يبنــي شكَده هــوه وينكَطـــع نحرك

أرجع خلــي آخر مرة أشم صـــدرك

أخــاف عليــك موحش يالولد كَبرك

أندفن يمك حلم عندي       وأحضن خـدك بخدي

أتاني يبني من زغري       يعبدالله أخـذ عمري

*******

حيدر حسين الكرعاوي