سلامات عليك وعالحبايب يعباس اصيح وما تجونــي ي | الشاعر حيدر حسين الگرعاوي
سلامات عليك وعالحبايب
يعباس اصيح وما تجونــي
يعباس وراكـــم سلبونــي
خوية يا راعي الخيم حركَو علينه الخيم
*****
يعباس ألمــن أشكي اذا ميتيـــن أخوتـي
وعلي اتمنــه يجيني عشر مرات موتــــي
چنت من كَد عفـــافي ميوصل أذني صوتي
الكــرة الأرضيــة كلها أبد مــاكو أبلوتـــي
أناديك واعرفك ما تجيني
أناديك أصَبر ابيش عيني
خوية مو حيلي أنهدم حركَو علينه الخيم
*****
اَنه ويــــاهم سبيــة يخوية وأنت غايب
الدهر يركض عليـــه ويشبعنـــي مصايب
يطكَ مو حكَـــه كَلبه الفكَــد كل الحبــايب
الكَلب بس ما مشيتو عليكم صار شـــايب
بلا روح رحت وي الضعينــه
بلا روح بعد محـــد يجينـــه
مهجتي متروسه هم حركَو علينه الخيم
*****
شكَلت لمــن عفتني أظل ويامــن آنـــي
وحكَ طيحت يمينـك يشيبنــي زمـــانــي
أموت آني امكـانك وتعيش أنت امكاني
لون ميته على جودك بقيت ألمــن شجاني
على الصار أخلص عمري أنحب
على الصار الكَلب مو راسي شيب
ريته بعيوني السهم حركَو علينه الخيم
*****
أحاول أنسه روحي وأرد أبچي على حالي
جبل ضيم على كَلبي وأخـــاف من الليــالي
أريـــدن مــا اذكــــرك وصرت عبـاس بالي
أجه المــوت وخذاكم وحركَ روحي أجالي
يوفاي يسب بيــك الضربني
يوفاي السيــاط شكَد تحبني
شبعتني من الألم حركَو علينه الخيم
*****
اليسر رايدله وآلي وأنــه ميتــات أديــة
أنعميت من الرزايــا واموت على المنية
يوكَع دنيــه عباس مصــاب الغــاضرية
أشوف الموت يمنــه أظــن يــاخذ رقيــة
أنسبت وين يبو فاضـــل خواتك
أنسبت وين التسميهن حيـــاتك
بلاية وليـــان الحرم حركَو علينه الخيم
*****
يجن يا خوية ليلـي وأســـاهر ما أنامــــة
شكثر تدري يعبــاس حزن شــايل ظلامــة
أحيـــر بضيم كَلبـــي أحيـــرن باليتامـــة
بسواد عيونــــي تلكَه ألف حيرة علامــــة
عسه المــوت أجالي وما اجالك
عسه المــــوت اخذ عمري ابدالك
بالسبي كَلبي عِلــم حركَو علينه الخيم
*****
يبو فاضل طلع دم من الأحبــال البدينه
الشماته ويانه تمشي ويضحكون لبچينه
أسَكت روحي أكَلها السهم طفــاله عينه
الچفوف على الشريعة بعد بيمــن يجينـــه
ألف آآآآه على العشــرة وأهلنه
ألف آآآآه بعد شيـــــرد زمنـــه
بالكَبــور أهل الشيم حركَو علينــه الخيم
*****
حيدر حسين الكَرعاوي
