أنه المثلي يبوية بحضن أبوها رقية من أنكَطع راسك سبوها بعد ذي | الشاعر حيدر حسين الگرعاوي

أنه المثلي يبوية بحضن أبوها
رقية من أنكَطع راسك سبوها
بعد ذيچ المهابة أموتـن بالخرابة
************************
خمس سنين بس تكَول ميتين
يموت الي يفاركَ مثل الحسين
شوية شوية تعمه كَامت العين
أنه يوميــة بوية متـــانية البين
مو مالت سبي وراحت سبية
چم واحد ضرب بتــك رقيـــة
يا ليلي ومصابة أموتن بالخرابة
**********************
ألمـن عايشــة الميت عمـــرها
حكَهــا تموت بتــك من قهـرها
روحي زغيرة وهمومي شكبرها
راح تمـــوت يحسيــن أنتظـــرها
ملك المــوت كل ســـاعة يجيني
كلشـي مـات بيــة بس ونينــي
ويسد عمري بابة أموتن بالخرابة
**********************
هيچ وحلم تطلــع هالمصـــايب
وترد أيامنــه وكــل الحبـــايب
أنه مجبورة يابوية من أعاتب
خمس سنين بس تكَول شايب
أنه كل لوعة تاخذ مني حيلي
تدري الموت كل ساعة يجيلي
على فراكَك ييابه أموتن بالخرابة
**********************
الأبو لو مات بويـــة تموت بنته
عمري من متت چــا مـا أخذتـه
يبچيك شكثر لو حـــالي شفتــه
وجهــي عليك بوية شكَد لطمته
البعمـــر الورد مو مـــال فركَــة
رقيـــة عليك راح تمـــوت حركَة
وكَف كَلبي بغيابة أموتن بالخرابة
**********************
فراكَ وخوف بويـــة ويسر وآلام
كل يوم اليمر عليــة ألف عــــام
أدري بروحــي اموتن باقــي أيام
رحمة من الله اذا ما اوصل الشام
أموت ولا قهر هـــاي الليــالي
بالطــف ضيعت كــل الغوالـــي
لا هل لا كَرابة أموتن بالخرابة
**********************
الأبوها يروح منها تعيش صعبة
ألـه بدينـــه تشبـــه كون كَلبــــه
الله اليـــدري أبوي شكَد احبـــه
خــــافن يدفنونــي بدار غربــة
يشبـــه موتي خاف أيام عمري
محد بويـــة خــاف يزور كَبري
وهمي يظل عذابة أموتن بالخرابة
**********************
حيدر حسين الكَرعاوي