جديد ..... قصيدة (( آبسليمان الهوه )) لسان حال الهواء وهو يخاطب السيدة زينب ويصف لها ماذا فعل العباس(ع) وكيف تملك كل شي حتى الهواء في طف كربلاء ■■■■■■■■■■ آ بسُليمْان الهَوهَ ... قِسم يَمْ العقيله بِست طَرف اللوه ...شسولفلچ قليله طَبهه يلهب وغار .... طَبهه و الأثر نار .... طَبهه و الأثر نار ■■■■■■■■■■■■■■ من بعد ذاك النبي ما مِلَك امري البشر واصبحت هذا المسه محبس بچف الگمر ارد اسولفلچ واسمعي عل غُفه بِسد النهر كافلچ طب وگلبهه و تَيَهت بعده الأثر لهب بيهم عصف.... فحل ينفض مراجل ضوه بيهم خطف ... دخيلك يابو فاضل يسحگ بيهه لو دار .... طبهه و الأثر نار .... طبهه و الأثر نار ■■■■■■■■■■■■■■ غار والخيل تصهل صرنه نتسابگ سوه يلتفت حاچه مُهره فحطت گال الهوه ذلهم وچفينه تحصد والبطل بيهم هوه(وگع) يعبر وتوكع رگبهم كل شبر بالدم روه حرت جنحي انكسر .... بعدت عني خيله طحت بين الحُفر ... حرت مابيدي حيله اسرع مني من سار ... طبهه و الأثر نار .... طبهه و الأثر نار ■■■■■■■■■■■■■■ من يمينه لو شماله يأمُر وطوعاً أهب تمَلك الموت وملكني شنهو عنه الينكتب خانگ الكون وترفرف رايته فوگ العذب شايل الشاطي بجربته والگُمر ما ينغلب مِلك كل النهر .... فكس عين الشريعه لعيونچ صُبر ... ذبل لأجلچ ربيعه ضامي وبيچ محتار ... طبهه و الأثر نار .... طبهه و الأثر نار ■■■■■■■■■■■■■■ گلي إگطع نَفَسهُم والارض ساحة حشر عالنهر وحده يشمني و ما ترك الهم ذكر شفته ينظر من يحارب رايد يصيد الشمر استغلو هايه فرصه وطالت اچفوف الغدر وگع چف الوفه ... نزف جفنه ويمينه على جوده غُفه ... صحت الله اليعينه موقف مثله ما صار .... طبهه و الأثر نار .... طبهه و الأثر نار ■■■■■■■■■■■■■■ حاولت بلکت اسنده عالوجه زينب وگع كعبه طِفته عالشريعه والنَفس لا ما رجع بالجروح اندب افزع ولاجرح منهن فزع ما يشمني وأنه اشمه والأمل كله انگطع غفت عينه رحل ... يزينب يالحزينه ابو الغيره انچتل ... بقه منهو اليشيله حسينچ بعده محتار... طبهه والأثر نار ... طبهه والأثر نار ■■■■■■■■■■■■■■ مستحي قبلي اعتذاري زينب ادموعي نده هذا خيط الفوگ چفچ جبته الچ من رايته گولي أُمري وأبخدمتچ انه جندي و سيده اگلب النار واصدهم وافگس اعيون العده ألچ اصبح مدد ... اعمي اليدنه شوفه يبت ذاك اسد ... بيهم والله خوفه يمچ كلهم اصغار .... طبهه والأثر نار ... طبهه والأثر نار ■■■■■■■■■■■■■■ الشاعر : حيدر العمار الخزعلي .■■■■■■■■■■■■■■■■■ ملاحظه : لأي استفسار او توضيح للكلام او اللفظ والمعنى خادمكم و يمكنكم مراسلتي على الخاص 679 viewsحيدر العمار الخزعلي, edited 15:39
