جديد ... قصائد محرم الحرام قصيدة ((على هونچ يناگه )) ●●●●●●●●●●●●●● على هونچ يناگه من تمريهم أودعهم أريد وخل أحاچيهم و يتوادع الراس باجساد هالناس على هونچ يناگه من تمريهم 》》》》》》》》》》》》》》》》 سامعه و اعرف يناگه انتي هم بيچ المحنه صح هزيله بس اسمعي ذوله عل غبره زلمنه انه مو گصدي اجرحچ بس منو يسمع ألمنه لو وصلتي بهيده يمهم حَدري ابراعي علمنه صعبه للسبي امشي واجافيهم ساعه و نفترك چا وين الاگيهم ما باقي حراس بأجساد هالناس 》》》》》》》》》》》》》》》》 هونچ اعلينه و اخبرچ كل اسم لمن نمُرهم لا تخافين واصبري هم يطگ ضهري شمرهم ذوله ما عدهم كرامه بس حقد خضر دربهم قوم صالح مو مثلهم ما وصل واحد صورهم مريلي بهلي الحلوه طواريهم وني بونتي وامشينه گصديهم لوعندچ احساس بأجساد هالناس 》》》》》》》》》》》》》》》》 هذا الأكبر هذا جسمه وذاك راسه البل رمح هاي ليلى التبچي امه وجهه چن وجه الصبح والي طايح غاد منه وعل متن شعره السرح جاسم العريس اسمه و رمله أُمه المنذبح آهي وحسرتي ياناگه شوفيهم ياريت العمر يهدونه واهديهم يتفاوح الياس بأجساد هالناس 》》》》》》》》》》》》》》》》 ذوله ل گبالچ اخوتي ذوله التلاثه السوه بل الوفه ضلت توصي امهم وشح الضوه و عالنهر طايح گمرهم نايم بحضنه اللوه وعن يسارچ ذوله ولدي الاشم بيهم هوه ولدي و اخوتي منهو اليواريهم ضلو عالثره وممدوده رجليهم ماضلت انفاس بأجساد هالناس 》》》》》》》》》》》》》》》》 حگچ و تنزل دمعتچ ما حمل گلبچ ألمنه بالفله يا ناگه نبقه و عالنهر يغفه الكفلنه هذا عباس و جربته هذا چف البي أملنه راعي الزنود شيرده ينهض وبيده يردنه شيال اللوه هذا الفتک بيهم زلزل كربله لأعدائه سئليهم يا هوه عباس بأجساد هالناس 》》》》》》》》》》》》》》》》 لو وصلنه حسين اعثري خل اطيحن عالارض خل اشبگه وانعه يمه واركض بطول وعرض اركض واجمع ضلوعه وافترض بلكت فرض انشغ ابكتره واموتن و العُمر يگضي و يفض تمنيت انذبح ما ريد اخليهم وعيون العمت گالتلي ودعيهم كل طبره مقياس بأجساد هالناس 》》》》》》》》》》》》》》》》 هذا عبد الله يناگه واللقب اسمه الرضيع فوگ صدرحسين فرفح وارتوه من النجيع سهم المثلث اجاله و من عبر نحره الگطيع السماء السبعه صاحت باجر انته هم شفيع هذا اصغر شهيد البلعُمر بيهم قصه قصته غير النظرتيهم عبد الله نبراس بأجساد هالناس 》》》》》》》》》》》》》》》》 الشاعر : حيدر العمار الخزعلي 》》》》》》》》》》》》》》》》 11 viewsحيدر العمار الخزعلي, 12:11
