بحجابنه . الكون انستر .. بحجابنه . يحجي الدهر .. بحجابنه . نغط | الشاعر حيدر مطر العبادي

بحجابنه . الكون انستر ..
بحجابنه . يحجي الدهر ..
بحجابنه . نغطي القهر ..
بحجابنه.. بحجابنه
................................
زينب أنه الهاشميه مدرسة عفه وحجاب ..
علمتني دروس أمي كبل مايعصرهه باب ..
وأنكسر ضلع الزجيه أتحملَت لوعه وعذاب ..
بس بقت عفه وقداسه وللستر صارت كتاب ..
ودروسهه . ستر المره ..
ودروسهه . مو سافره ..
ودروسهه. تظل جوهره ..
بحجابنه .. بحجابنه
..................................
من وصلنه الغاضريه والعدد كلش قليل ..
طالبيات وخيمنه حارس عليهه الكفيل ..
أبد منهاب المنيه ويه ابن حامي الدخيل ..
أحنه أميرات بخدرنه هذا خطنه وما نميل ..
لخيامنه. محد عبر ..
لخيامنه . يحرس كمر ..
لخيامنه . قيمه وقدر ..
بحجابنه .. بحجابنه
.................................
يوم عاشر من محرم من على التل البعيد ..
شفت غارات الكفيل على العساكر كالرعيد ..
وطاحن يمينه ويساره البيهه ذل زمرة يزيد ..
عالنهر ساقي العطاشى مخضب بدم الوريد ..
وأطفالنه . ظلت توّن ..
وأطفالنه . تبجي وتحن ..
واطفالنه . تمسح حزن ..
بحجابنه .. بححابنه
..................................
حسين عالغبره رميه وألطم وأبجي بسكوت ..
لو رحل شلي بحياتي كون ويه حسين أموت ..
ميسره تمشي الأميره وعالجمر تمشي وتفوت ..
ترضه زينب عالهزيله والخدر يطلعله صوت ..
وشحالهه . لبوة علي ..
وشحالهه . راح الولي ..
وشحالهه . ريحة هلي ..
بحجابنه .. بحجابنه
.................................
أنظر النار المخيم شبت وصارت رماد ..
حرم وأطفال بخيمنه وخافت من أهل العناد ..
وانه محد شاف طولي وخدري للزهره أمتداد ..
زحمه أركض وانه زينب ستري للمذهب عماد ..
واخلاقنه . ورث النبي ..
وأخلاقنه . برغم السبي ..
واخلاقنه . خدر وعبي ..
بحجابنه .. بحجابنه
................................
أبد ماجانت أبالي عالهزل مسبيه أروح ..
تارسه عيوني المدامع سكته من أبجي وأنوح ..
والله درب الشام حيره سياط وآلام وجروح ..
شمر يسطرني على وجهي وعالرمح راسك يلوح ..
وجتافنه . طول الدرب ..
وجتافنه . شبعت ضرب ..
واجتافنه . بس تنحجب ..
بحجابنه .. بحجابنه
...................................
حيدر مطر العبادي