خل نودع زينب بهليله .. كل محب دمع المصيبة يسيله.. ............ | الشاعر حيدر مطر العبادي

خل نودع زينب بهليله ..
كل محب دمع المصيبة يسيله..
..............................
خل نودع زينب بهذا المسه..
الزمن وي العقيله شكد قسه..
اتحملت بالصبر صارت مدرسه ..
لا أخوان ولا أبو التشكيله..
خل نودع زينب بهليله..
............................
نلطم على الراس ونهل الدمع..
مثل ليلة فاطمه وكسر الضلع ..
انطفت بالسمه شمس الله التشع..
والشمس رادت كمر تحجيله..
خل نودع زينب بهليله ..
..................................
خل نودع زينب وندمي الصدر ..
عالعقيله ام المصايب والصبر ..
عدهه أمل عباس يرجع تنتظر..
تدري بيه يكلبهه من توميله..
خل نودع زينب بهليله ..
..............................
بحسره وأهات ومدامع وبحزن ..
خل نودع بت علي وأخت الحسن..
جبل يتحدى المصاعب والزمن..
اليوكف بوجه الجبل ياويله..
خل نودع زينب بهليله ..
............................
ننصب اليوم المجالس والعزاء..
مره بأرض الشام مره بكربلاء..
نبجي عالمظلومه بت خير النساء..
الورثت من أمهه حجاب وشيله..
خل نودع زينب بهليله ..
..............................
الليله ننعى أم الصبر وأم الجروح..
عالعقيله للصبح نبجي وننوح ..
ومن مجالسنه عطر جنه يفوح ..
اليبجي دمعه بالحشر توفيله..
خل نودع زينب بهليله..
..............................
خل نودع زينب نصيح العجل..
سيدي ومولاي يالبيك الامل..
شوكت تظهر يانسل خير العمل..
ندعي للمهدي الفرج تعجيله..
خل نودع زينب بهليله..
..............................
حيدر مطر العبادي