كعديه على طور ياليل طول ساعاتك لذكرى وفاة السيده زينب ع ياموت | الشاعر حيدر مطر العبادي

كعديه على طور ياليل طول ساعاتك لذكرى وفاة السيده زينب ع
ياموت عجّل شمتاني ..
مادام فاركت أخواني ..
والعيشه بلا خوان ..
دمعه ولوعه وأحزان ..
......................
من الزغر جانو أخواني همه روحي وأعز ناسي ..
ويه الأخو محد هضمني ولا زجر يجرح أحساسي ..
وأيدي ماشافت حبال وأبد مادنكت راسي ..
جان العمر كلش حلوو ..منا أخو ومنا أخوو ..
وصارولي من راح الأبوو .. هوه وتتنفسه أنفاسي ..
مايوم سالن دمعاتي ..
ولاعين شافت خطواتي ..
هيبه و فخر النسوان ..
دمعه ولوعه وأحزان ..
..........................
تعيش مهيوبه وعزيزه الأخت بوجود أخوهه ..
هم يسد سدة الوالد لأخته لو ميت أبوهه ..
يفدي جفينه وعيونه لو نواصب حاربوهه ..
بوجوده أبد ماتنضرب .. ولاتنسبي لديرة غرب
وميخلي دمعتهه تصب .. وعالهزل ماركبوهه..
مايوم واحد يدنالي ..
بوجود عباس الغالي ..
اليرهب كل العدوان ..
دمعه ولوعه وأحزان ..
..............................
كربله شيبت راسي والعمر ذبلت أيامه ..
بالمخيم نار شبت حركت أحلام اليتامه ..
آنه زينبكم وأنادي وين صرتو يالنشامه ..
من طاح شيال العلم ..وياه كل حيلي أنهدم ..
حلم الطفوله أصبح وهم .. وأنكسر جنح الحمامه ..
عباس طاحن جفينه ..
عطشان والنبله بعينه ..
بلا ماي ميرد خجلان..
دمعه ولوعه وأحزان ..
..................................
وأنه أطفي النار بيدي تبجي الأيتام وتنادي ..
وين ابو الأكبر يعمّه وين ريحانة الهادي ..
ووين أبو فاضل كفيلج كاسر خشوم الأعادي ..
شنهو السبب وتأخروو .. بحرك المخيم مادروو
عالغبره أخوتي أتطشروو .. وأحنه ضعنه بالبوادي ..
ناديت أخذوني وياكم ..
ماعيش لحظه بلياكم ..
مابين نار ودخان ..
دمعه ولوعه وأحزان ..
...............................
من كثر حزني على أخوتي شكد تمنيت المنيه ..
أشلون يتشتت شملنه والعمر عشناه سويه ..
أآه ياليلة العاشر وآآه من الغاضريه ..
حسين مكطوع النحر .. وعباس طايح عالنهر
للشام وبدرب الخطر .. مشت زينبكم سبيه ..
يحسين ليش تخليني ..
للموت ماتنشف عيني ..
عالخد حفرن نهران ..
دمعه ولوعه وأحزان ..
.....................................
هاي أحس آخر مسيه ويمي ملك الموت حاضر ..
يكلي يازينب أجيتج من الطفوف وآنه ناطر ..
شفتي بأرض الغاضريه خيل ودموم ومناحر ..
محد حضر من أخوّتج .. بالشام صارت موتتج
أمّده الدنيه الخلتج .. بلايه أخو وسط المكابر ..
بديار غربه يدفنونج ..
ونيشان باقي على متونج ..
منسياط زمرة سفيان ..
دمعه ولوعه وأحزان ..
...................................
حيدر مطر العبادي