ذبل غصن الزيتون . الجبد بالسم مطحون . بسجن أظلم مسجون . سيدي | الشاعر حيدر مطر العبادي

ذبل غصن الزيتون . الجبد بالسم مطحون .
بسجن أظلم مسجون . سيدي . سيدي
..............................
على اغلاله وقيوده . يهل دمعه بسجوده .
تره الكاظم بجت حتى الحياطين على موده.
غفت حتى الحمامه . بحضن راعي اليتامه .
لكت شمس الله طفّت بالسجن عتمة ظلامه .
وسط سجن الفجّار. صبر زهد وأيثار .
يمدرسة الأحرار. سيدي . سيدي
................................
عشت لوعة عذابك .وانه اتنطر جوابك .
ابد ماينوصف ياسيدي حالي المصابك .
تمر صعبه الليالي . على الشيعي الموالي .
سؤال بعيني بس باب السجن جاوب سؤالي .
بحفيره الكاظم غاب . فلا نفتح هالباب .
ولانذكر اسباب . سيدي . سيدي
..................................
امامي الطيبه ذاته . فلا فارك صلاته .
صبور وماجزع رغم بسجن خلّص حياته .
الف حيف ووسافه . ذبل غصن الترافه .
ونعش راهب بني هاشم بقه بجسر الرصافه
بسجن بن شاهك مات .رحل قاضي الحاجات .
عليه تجري الدمعات . سيدي . سيدي
..................................
بقت مجتوفه ادينه .بحديد مكيدينه .
ولا شاف الشمس سجن بسجن خلّص سنينه
اعوفك مستحيله . يبو السجده الطويله .
نبض كلبي يدك بأسمك يمعشوكه وخليله
انه المايوم انساك . اظل بالشده انخاك .
خسر كلمن عاداك . سيدي . سيدي
...................................
مثل شمس الحقيقه . الظلم لا مايطيقه .
لذلك مقتدي بجده الحسين يمشي بطريقه
السجن نفس الخرابه . فقط مسدوده بابه .
غريب وزينب بغربه الدمع يمطر سحابه .
وحك جده العطشان . كسر خشم الطغيان .
الانس تشهد والجان . سيدي . سيدي
.................................
جرع سم المنيه . وذكر ضلع الزجيه .
وذكر محسن وره الباب الوكع ذيج المسيه .
يعاين ظل طبيبه . وينوح على المصيبه .
غريب وجنازته فوك الجسر ظلت غريبه .
نعه الناعي الاخبار .يشيعه ويا أنصار .
رحل ابن الاطهار . سيدي سيدي
.................................
حيدر مطر العبادي