لسان حال الأيتام وهم يودعون الأمام علي ع على طور ياليل طوّل س | الشاعر حيدر مطر العبادي

لسان حال الأيتام وهم يودعون الأمام علي ع
على طور ياليل طوّل ساعاتك
ياعيد .. لا تلفي علينه ..
لو راح .. حيدر والينه ..
البعيونه نشوف العيد .. خلانه وراح أبعيد
......................
جان عدنه العيد حيدر . هلال نفرح من نشوفه ..
الباب من يندك علينه .نركض بلهفه ونطوفه ..
أحلامنه شايلهه بيده . واليتم يعرف ظروفه ..
لو شافنه كلبه أنشرح . ملثم وجاب النه الفرح .
أهلالنه براسه أنجرح . وأبد مانكدر نروفه ..
بخضاب .. دمه من الهامه ..
الكرار .. محتاره أيتامه ..
بفي حيدر تغفه تريد.. خلانه وراح أبعيد
.....................
كلمة الأيتام دمعه . حافره على الخد نهرهه ..
والجفن زاعل رمشهه . طوّل الليل وسهرهه ..
وكابلت بابك يحيدر . للحسن تشكي قهرهه ..
كالت يمولاي الحسن . هسه أبتدت عدنه المحن
حيدر بهالليله أمتحن . وهامته المجرم طبرهه ..
أحلام .. راحت وي حيدر ..
من الهام .. ظلت تتطشر ..
والطاح ماينلم بيد . خلانه وراح أبعيد
...................
ليش ياسيف المنيه . طشرت كل الأماني ..
الكساء أصحابه خمسه . وعلي بعد النبي ثاني ..
هاي ليله شكد رهيبه .. ويرتجف ميل الثواني ..
بليلة قدر كلشي أختلف . والدمع عالخد مانشف
حيدر علي بأرض النجف . واليتامه تظل تعاني ..
برمضان . شمس الله أنصابت ..
والنور . غادر من غابت ..
نيران تسعر متهيد .. خلانه وراح أبعيد
...................
شلهه بالعيد اليتامه . لو رحل حامي الحميه ..
نجوم ظلت بس سماهه . انشطرت بعظم الرزيه ..
تنتظر شمس الله تطلع . وتنزل الدمعه جريه ..
كل اليتامه تنتظر . جف حيدر عليهه يمر
مشتاكه للغالي أشكثر . راح ابو الجف السخيه ..
ياعيد .. ليش تلوعنه ..
ياعيد .. جيتك تفجعنه ..
حسره وآآه وتنهيد .. خلانه وراح أبعيد
........................
وزينب يعين الله زينب . شحالهه بهاي المصيبه ..
عاشت بنص كلب حيدر . وللابو كلش قريبه ..
لو رحل والدهه تدري . من أيدهه الراح شيجيبه ..
موقف صعب لا موسهل . لو رحل تصعد عالهزل
الحره مجتوفه بحبل . ميسره وتصبح غريبه ..
بالشام .. تكثر آلامج ..
بالشام .. منحر كدامج ..
الآهات بالغربه تزيد .. خلانه وراح أبعيد
........................
حسين ياعيد اليشوفه . والدمع تارس أخدوده ..
راد أبوه يحضر طفوفه . حيل محتاج الوجوده ..
لوطفت عين أبو فاضل . بالسهم وأتبده جوده ..
وحسين بالخيل أنسحك . وشهكة منيه لو شهك
عالكاع لو صدره أنطبك . والوسيعه بعينه سوده ..
ويصيح . حيدر ياحيدر ..
يدريك . ماتحمل منظر .
وهناك ينحّز أوريد .. خلانه وراح أبعيد
...............................
حيدر مطر العبادي