لذكرى وفاة الأمام جعفر الصادق ع ليش صحنك ماتشع أنواره.. كبر أم | الشاعر حيدر مطر العبادي

لذكرى وفاة الأمام جعفر الصادق ع
ليش صحنك ماتشع أنواره..
كبر أمام الشيعه بس حجاره..
هالكبر ياللعجب .. حجاره مو كبة ذهب
وصحن ماعنده يلم زواره..
...................................
للبقيع أبعث تحياتي وسلامي ..
بالكلب بحر وطفح شوكي وهيامي..
السادس أنوار الهدى الصادق أمامي..
الشفيع البلحشر هوه المحامي ..
هناك بحر المعرفه وأفكاره..
أندفنت بأرض البقيع أسراره..
هلحقد شنهو السبب .. حجاره مو كبة ذهب
وصحن ماعنده يلم زواره ..
......................................
لو جنت مهموم والمحنه جبيره..
لبو الكاظم أنطي وجهك لبو الغيره..
هذا شيخ المذهب الما صح نظيره..
تنكضي الحاجه وأبد ماتبقه حيره..
الحاجه يمه تنكضي وخلصانه..
يم عميد المذهب وعنوانه..
مدرسة علم وأدب .. حجاره مو كبة ذهب
وصحن ماعنده يلم زواره..
.....................................
البقيع الكربله تشكي الهضيمه..
بلا مناره ولاصحن جني يتيمه..
يمته نبني هالمنارات العظيمه..
وبالصحن مجلس عزه الصادق نقيمه..
أبد مايبقه على هاي الحاله..
واجب نخلّي الصحن يتلاله..
واجب ومو مستحب .. حجاره مو كبة ذهب
وصحن ماعنده يلم زواره..
......................................
أتوجهت لأرض البقيع أقره الزياره..
مني دمعات الوفه تصب بغزاره..
أبدماأسكت على الذل والمراره..
والحليم اليوم تكفيه الاشاره..
والنواصب تستمع أقوالي..
خل تفكر لاتشوف أفعالي..
وأدري ماينفع عتب.. حجاره مو كبة ذهب
وصحن ماعنده يلم زواره..
..........................................
باجر أنقيم المجالس والعزيه..
بالبقيع وتحضر الزهره الزجيه..
تجري دمعات الحزن غصبن عليه..
الجعفر الصادق أمام الجعفريه..
الشيعه باجر كبتك تبنيهه..
والمناره للسمه نعلّيهه..
وراحه يمك كل تعب.. حجاره مو كبة ذهب
وصحن ماعنده يلم زواره..
.................................
باجر بزود الزلم تعله المناير ..
هناك ننصب موكب ونحيي الشعاير..
وصوت بيهه يرتفع أهلا يزاير..
هذا موكب جعفري لاتبقه حاير..
ومشي نمشيلك عهد بأجدامنه..
والمواكب تنصّب كدامنه..
بشهر شوال ورجب.. حجاره مو كبة ذهب
وصحن ماعنده يلم زواره..
........................................
حيدر مطر العبادي