حيرني الفراك . صعب حيل . وأبد ماينحمل .. مذهوله ظليت . والأيد | الشاعر حيدر مطر العبادي

حيرني الفراك . صعب حيل . وأبد ماينحمل ..
مذهوله ظليت . والأيدين . أشعمل بيهه الحبل ..
........................
عندي أخو نعم الأخو عباس ابو الغيره ..
مايقبل أزعل وأنهضم من جنت انه زغيره ..
مرفوع راسي بهيبته وما أعيشن أبحيره ..
بنص الكتايب والحرب وجهه ألي يديره ..
أبوجهه يندار . والأنوار . ضواهن يشتعل ..
مذهوله ظليت .والأيدين . أشعمل بيهه الحبل ..
........................
بالطف أشم ريحة هجر خاف أفكد أخواني ..
بالليل دمعاتي تصب والنوم ما جاني ..
آنه وصية حيدره زينب لاتنساني ..
أرجعلي يانبض الكلب عباس شمتاني ..
ما أريدن الماي . يوفاي . ردت ترجع عدل ..
مذهوله ظليت . والأيدين . أشعمل بيهه الحبل ..
........................
ثكلت ارداني من الدمع ياسلوت أسنيني ..
وطرف العبايه محترك والنار تجويني ..
ترضاهه أظل الوحَدي وينك بعد عيني ..
مسبيه اروحن عالهزل لا لا تخليني ..
يالرايد أتروح . منى الروح . سوه أنلم الشمل ..
مذهوله ظليت . والأيدين . أشعمل بيهه الحبل ..
......................
ظلمه حياتي وفركتك ماجانت أبالي ..
بْعدك أبد ماينحمل مشتاكه يالغالي ..
أطفه وأذوب بغيبتك حال الشمع حالي ..
حتى بمماته على الرمح راس الكمر عالي ..
مادنك الهام . والأسهام . تسد عين النفل ..
مذهوله ظليت . والأيدين . أشعمل بيهه الحبل ..
........................
بسهام صوبني الدهر شيطيب أجروحه ..
الحالي ظل يبجي الصخر وآنه استمع نوحه..
ظليت أمشي بس جسد وعلى الرمح روحه ..
كدامي روس مخضبه وأحلام مذبوحه ..
وتدير الأنظار . وانه أحتار . لوّن يبجي طفل ..
مذهوله ظليت . والأيدين . أشعمل بيهه الحبل ..
......................
عكب الدلال بهيبتك بسياط ضربوني ..
تاليهه يشتمني النذل ويزورك أمتوني ..
شكوت دليلي تنسمع عباس هضموني ..
ويكلي وينه كافلج والدمعه بعيوني ..
مسبيه عالنوك . وأطب سوك . الدمع عالخد يهل ..
مذهوله ظليت . والأيدين . أشعمل بيهه الحبل ..
..........................
حيدر مطر العبادي