تقني او تقنيات او تقنية للي ميعرف شنو يعني، هاي تعني اخت | قناة الهيتي الجامعية✔️
تقني او تقنيات او تقنية
للي ميعرف شنو يعني، هاي تعني اختصاص دقيق
مثلا بالحضارات القديمة جانو المختصين بالبناء و التصميم و امور الأنشاء يسموهم "معماري"
جان المعماري هو يصمم و هو يشرف على عمال البناء
بعدين تطورت الحياة و شافو لازم واحد يكون مصمم لشكل البناية و واحد يصمم المواد الي تنفع للبناء مثلا نوعية الأسمنت و الكميات الي تحتاجها البناية و هو يشرف على العمل بدل المعماري و هذا سموه " المهندس المدني"
و هم تطور العلم و تطورت الدراسات و شافو اكو حاجة لأختصاص أكثر دقة يهتم بس بالتنفيذ و يصمم داخل الموقع حتى ينجز العمل بدقة أكبر و صار أسمه "مهندس تقنيات البناء"
هذا مثال ع البناء، كذلك الميكانيك تلكه اكو مهندس تقنيات القوى الي هي التبريد و التكييف او السيارات يعني اختصاصة منظومات التبريد او الصيانة التقنية للسيارات
او مهندس التقنيات التطبيقية الي هي اللحام و القوالب
مو شرط هندسة مثلا حتى التقنية الأدارية و الأدارة و الأقتصاد كلمن اختصاصه و علميته
و هكذا بقية الأقسام تعتبر أقسام مختصة و ليست اقل أهمية من القسم العام ابدا
الشهادة الممنوحة كلية الهندسة : تمنح البكالوريوس الكلية التقنية الهندسية : البكالوريوس التقني
ابدا ماكو تفضيل بينهم، الأثنين مهمات و العمل يتوزع بينهم و اثنيهم يكدرون يكملون ماستر و دكتوراه
الراتب متساوي و المخصصات نفسها و بعض الأحيان المهندس التقني تكون اله مخصصات خطورة على الراتب لأن عمله يكون بالموقع
ليش المعدلات منخفضة للهندسة التقنية؟ هذا لأن الطلاب الي يقدمون هم معدلاتهم منخفضة ابدا مو قياس للقيمة العلمية للكلية
و بالمناسبة جانت تقبل معدل ٩٠ قبل لا يصير النظام تطبيقي و احيائي
و اخير شي بالنسبة للتعيين اذا تكتسب مهارة و تتعلم ذاتياً و تضبط المواد و تتعلم البرامج الهندسية و الأدارية متحتاج تعيين اصلا تكدر تقدم على اي شركة و تنطيهم مهاراتك
و اي أحد يقلل من قيمة الشهادة فهو بلا قيمة عفوا، لأن دراسة اربع سنوات و تعب و سهر و امتحانات مهما كان الأختصاص سواء كان زراعة او اداب او هندسية او طبية و نكرر و نكول الي يحدد الأهمية هو ابداع الي يتخرج منهم مو عنوانه الوظيفي
