عندنا جريمة قتل ..ناتجها ام او طفل و الجاني رد يعترف.. واحنا ف | ا👑👑الصوت والقلم👑👑

عندنا جريمة قتل ..ناتجها ام او طفل
و الجاني رد يعترف.. واحنا فتحنا السجل
.................
فتحنا سجلهم رؤوس الجريمة
أخذنا اعترافات خطيرة او أليمة
يشرحون تفاصيل جناية عظيمة
عليمن هجمتوا اعله حرمة و يتيمة

کلمن روى قصته ...عن هجمته او غايته
فعل وفعل يختلف ...واحنه فتحنا السجل
………………………………………

شخص گال انا اللي اشعلت نار على الباب
حرگته و دخلنا و لا چان بالحساب
لگيت الزجيه وره الباب بلا احجاب
تنادي يبويه ولونه هالاعراب

گال آني شفت العجب ..وجه البتول انضرب
چف الصفعها صلف.. واحنا فتحنا السجل
……………………………………………

شخص گال ورا الباب تلاوذ شفتهه
ترا الباب ثگيله او عليها ادفعته
اعصرتها لحد ما تون اسمعتهه
تگلي عليمن و أنه اتجاهلتهه

آني اعصرتها بقهر.. و اسمع ضلعها انکسر
آني الولى ومايعف.. و احنه فتحنا السجل
……………………………………

يگول اصفعتهه و شفت دم بديه
أثاري الدمه من جفنها الزچية
أسبهه و كأنها غريبة و سبية
تگلي حجابي و گلهه شعليه

سبيت ابوها و بچت ..و تحسرت ما حچت
خفت الارض تنخسف.. و احنه فتحنا السجل
…………………………………………

شخص گال شفتهه و شفت غيم حزنها
زحف تمشي و اتگوم تدور اعله ابنها
اجه قنفذ ابسوط رغم دم جفنها
ولاها و ضربها غدا ازرگ متنها

واحد دفعها ابرمح.. يسطرها فوگ الجرح
احنه نکرنه العرف ..و احنه فتحنه السجل
……………………………………

شخص گال شفتها توزع نظرهه
لحيدر لفضه لإبنها و كسرهه
اختلط دم جفنها مع دم صدرهه
صدر صابه مسمار لمن ذاك عصرهه

عالحايط انظر دمه.. کسروا ظهر فاطمه
انظرها راحت زحف ..و احنه فتحنه السجل
..................................... ..

شخص گال انه ثاني اثنين اجوها
وديعة رسول الله لا ترحموها
اذا صاحت آني الزچيه اضربوها
تگيدون بعلها و تشتمون ابوها

عندي گلب ناصبي ..أكسر ضلوع النبي
خلي الحقد ينکشف..و احنه فتحنه السجل
…………………………………………………………

اکو واحد يصيح ابشري يزهره
گيدنه ابو احسين و لامن ينصره
ابچي على حسين و انظري اعلى نحره
باچر نذبحه و ندوس على صدره

زينب يجيها الشمر.. واشکم ظهر ينکسر
قصتها ما تنوصف ..و احنه فتحنه السجل.

الشاعر السيد عبد الخالق المحنه.