2021-08-24 14:36:34
Past Modals (part 1)
القاعدة بتحكي عن شيء اسمو past modals واللي معناها الأفعال المساعدة بصيغة الماضي.
اول شغلة لازم نعرفها إنو الأفعال المساعدة لاااا تشير إلى زمن محدد بشكل عام. خلينا ناخد مثال:
Would you please open the door?
بهاد المثال عنا الفعل المساعد would وهو متل ما بتعرفوا "ماضي" بس دلالة الجملة ليست للماضي. الجمة معناها "ممكن لو سمحت تفتح الباب؟"
وإذا شفنا ترجمة الجملة منلاقي إنو مالها علاقة بالماضي.
الخلاصة: الأفعال المساعدة نفسها ما بتعبر عن الماضي او الحاضر. لكن كيف؟؟؟؟؟
بدنا نطلع عالصيغة اللي بتجي بعدا و هي بتحدد اذا عم نشير للماضي او للحاضر او للمستقبل. خلينا ناخد مثال:
1. You should study hard.
2. You should have studied hard.
الجملة الأولى معناها "لازم تدرس اكتر او بنصحك تدرس اكتر" و دلالتها للحاضر.
كيف عرفنا؟
إجا بعد الفعل المساعد فعل بحالة المصدر.
معناها رح نتبنى القاعدة التالية:
Modal + verb zero دلالة للحاضر او المستقبل
اما بالمثال رقم ٢ هون عنا وضع مختلف.
2. You should have studied hard.
معنى الجملة "كان لازم تدرس أكتر" و دلالتها للماضي.
كيف عرفنا؟
إجا الفعل المساعد و بعدو have مع فعل بالتصريف الثالث.
و لهيك رح نتبنى القاعدة التالية:
Modal + have + verb 3 الدلالة حصرا للماضي
*************************هلأ رح نبلش بالقاعدة:
الأفعال المساعدة اللي بترمز للماضي منصنفها حسب المعنى اللي بتعطيه ع شكل ٣ مجموعات اللي هيي:
المجموعة رقم واحد:
الصيغة
Must + have + verb 3
المعنى: أكيد هالشي صار بالماضي
يعني بستعملا لاحكي عن شي صار بالماضي لأني متأكدة منو مية بالمية.
مثال:
اذا تابعتوا مسلسل رضوان البرنس ...اذا انقتل رضوان هلأ شو رح تقول الشرطة لأخواتو؟؟؟؟
You must have killed him.
المعنى: اكيد انتو اللي قتلتوه و الشرطة بتكون متأكدة مية بالمية.
مثال تاني:
كنت قاعدة عالبرندة و ابن الجيران كسر بلور سيارة جارنا. اجا الجار لعنا و قلي:
You must have seen who broke my car window.
اكيد شفتي مين اللي كسر البلور
وبهي الحالة هو متأكد مية بالمية و عندو سبب و لهيك استعمل must.
المجموعة الثانية:
الصيغة:
Might / may / could + have + verb 3
المعنى:
يمكن هالشي صار بالماضي بس مو متأكدة (مجرد تخمين) وبهالحالة ما عندي اسباب لكون متأكدة.
خلينا ناخد امثلة:
حكيت مع أخي مشان يجي ع بيتي الجديد و تأخر..شو بقول لحالي؟ يمكن ما عرفت دلو عالمكان صح .
I might have given him wrong directions.
مثال تاني
طلعت بباص هرشو و ما كان كتير عجقة بس بعد ما نزلت مالاقيت تلفوني. شو بقول هون؟
Someone may have stolen my phone in the bus.
يمكن شي حدا سرقه بالباص (بس مو متأكدة)
انتبهوا انو الكلمات الثلاثة (might / may / could) بيعطوا نفس المعنى بهالحالة.
Someone may / might / could have stolen my phone in the bus.
المعنى هون رح يضل نفسو بغض النظر اي واحد من الأفعال استعملت
المجموعة الثالثة:
الصيغة:
Cannot + have + verb 3
المعنى:
منستعمل هاد الفعل لما بكون متأكدة مية بالمية انو شيء معين ما صار بالماضي (متأكدة بالنفي)
وبهالحالة بيكون هالتركيب هو عكس المجموعة الأولى تماما. كيف؟
المجموعة الأولى must + have+ verb 3 متأكد بالايجاب
عكس المجموعة الثالثة اللي هي cannot + have + verb 3 واللي هي متأكد بالنفي.
الخلاصة:
Must have # cannot have
مناخد مثال ع cannot have وقت بكون متأكد بالنفي
مثلا:
Jane cannot have seen us. It was too dark.
مستحيل تكون جين شافتنا. كان عتمة كتير.
مثال تاني:
عم اتصل بأهلي الساعة ٩ مساء و ما حدا عم يرد...بقول:
They cannot have gone to bed.
يعني مستحيل يكونوا ناموا من هلأ
ملاحظة.. ممكن حدا يسألني إنو بالحالة الثالثة عم نستخدم cannot have.... طيب فينا نستعمل could not have الجواب طبعا منقدر
Jane cannot / could not have seen us. It was too dark.
بالنسبة للفعل should كمان ممكن يعبر عن الماضي. كيف؟؟؟
عنا التركيب التالي أو الصيغة التالية:
Should (not) have + verb three
أما بالنسبة للمعنى:
Should have + verb 3
كان لازم اعمل كذا
Should not + have + verb 3
ما كان لازم اعمل كذا
رح ناخد امثلة:
عندك امتحان و طلعت متأخر شوي و حسيت حالك حتوصل متأخر. بتقول:
I should have left earlier.
كان لازم اطلع بكير.
حسيت برمضان انو وزنك زايد. بتقول:
I should have eaten less.
كان لازم أكلي يكون أقل.
اما بالنسبة ل should not
كنت معصب و حكيت مع حدا كلمة بشعة. بعد شوي ندمت و قلت:
I should not have said that.
ما كان لازم قول هيك (بمعنى ياريت ما حكيت هيك شي)
472 views11:36
ا
