بعض الأرقام في اللهجة السورية لها إستخدامات مختلفة جدا.. وهى | يوميات حمصي

بعض الأرقام في اللهجة السورية لها إستخدامات مختلفة جدا..
وهى 60 و 100 و 10 و 1000 و 7 و 2
فعلى سبيل المثال:

الرقم (60).. يستخدم فقط وحصرياً دون عن باقي الأرقام في الشتيمة..
مثل (ابن "60" كلب).. ولا يقولوا مثلاً ابن "50" كلب ولا ابن "70" كلب
هو بس 60 كلب فقط
على نفس المنوال اابن ال(60) صرماية .. ؟؟؟
ويستخدم الرقم (60) أيضا لوصف اسوأ مكان أو وجهة
انقلع او روح في (60) داهية.. وابداً ما حدا قال ب 80 داهية مثلا ابدا ..
أو حدّك (60) جهنم مثلاً.. مو حدك 40 جهنم لاء..

وأوقات يستخدم رقم (60) للتوبيخ:
(60) مرة قلتلك لا تعمل هيك.. هية بتكون مرتين..
(60) مرة ناديتلك.. هية بتكون 3 مرات أيضاً..

أما الرقم (100) للتسليمات..
(100) أهلا وسهلا.. مامنقول 50 أهلا وسهلا مثلا..
(100) السلامة.. مو 40 سلامة مثلا..
(100) وردة بهالطلة.. مو 25 وردة مثلا..

اما (10) فتستخدم لوصف جودة الأشياء أو الأفعال ..
(الشغل 10 على 10) يعني ماشي تمام..
أو (فتح عيونك 10 على 10) يعني انتبه..

اما الرقم (1000) يستخدم تحديداً في التهنئة..
(1000 مبروك).. مافي 100 مبروك مثلا؟؟
(1000) الحمدلله عالسلامة.. مافي 20 الحمدلله مثلا!

اما الرقم (7) في الوصف فهو ظاهرة غريبة جدا، وهي الحيرة الشديدة أو البحث المتواصل والمتعب عن شيء أو شخص ما ..
دخت ال(7) دوخات.. لحد ما لقيت فلان أو هالغرض الخ... )
كما يستخدم الرقم (7) للتعبير عن النوم العميق..
(ما رح يرد عليك ، شكلو ب "سابع" نومة)..
على اساس انه لو ب "سادس" نومة كان قام عادي ورد !

اما الرقم (٢) وهو أطول مدة زمنية في الكون و هي (الساعتين )..
(صرلو "ساعتين" بنفس القصة) هية بتكون ٥ دقايق..
(صرلي " ساعتين" ناطرك) هية بتكون 7 دقايق..
(صرلي "ساعتين" عم فهمك هالشغلة) هية بتكون ٥ دقايق..
(هلكت صرلي " ساعتين" واقف عرجليي) هية كمان بتكون شي 3 دقايق