طبعا التعالي ع الاسرة او التعالي ع الحبيب او التعالي ع الاخر | 🌍عالم الابراج ✨✨
طبعا التعالي ع الاسرة او التعالي ع الحبيب او التعالي ع الاخر اللي جايه من السيطرة على الحبيبة او الزوجة او الاطفال بحجة الزواج او الحب او الابوة امر معيب ومخيف ومغامرة حقيرة اذا ماتفتح ابواب گلبك بحب وبوعي وباريحية مع اللي يحبونك راح يجي يوم تتفاجأ بضربة راح توجه الك من زوجتك او بنتك اللي جنت ماتسمعلهم كلمة حوار او نقاش او راي او دندنة سخيفة ممكن تطلق من هنا او هناك بسبب عقد دفينة وقديمة جايه نتيجة فلسفة والله هاي زوجتي وذيچ بنتي يعني ماعدهم غيري وين يرحون ووين ينطون وجههم؟!وانت غافي ومطمئن على هذي الفلسفة الرخيصة وماتحس الا يجيك بوري يخليك تقرا الديك حمار الان الابواب مشرعة والاذان كثيرة والمقترحات متوفرة وشريك العقد والحل موجود ومتوفر اذا ماراح تسمع صوت زوجتك او ذوق زوجتك او رأي زوجتك واذا ماراح تسمع راي بنتك واحلام بنتك ولو بمقدار معين فانتظر جرح لايتضمد وفشخة لاتداوى والم لايهدأ لحظة وحدة تغير حياتك صفنة وحدة بوجه بنتك راح تغير حياتكم طلعة وحدة باريحية ولفتين همبركر او فلافل بدون صاص راح تگلب الدنيا عد بنتك لزم من ايد بنتك وانتم تمشون وتتنصتلها باحترام راح تخليها تعبدك وتعبد صورتك اللي بمحفظتها تره اللي يحبك يگدر يحب غيرك واللي يعتبرك اب يگدر يلگه اب غيرك واذا حضنك مشغول اكو الاف الاحضان مجرد ضغطة باسوورد راح يلگه كل الاختيارات كدامه حضن زوج اب كلها متوفر باكثر من عشرين برنامج اخطر من الرصاص الحب احترام والاحترام اسمى غايات الحب
