حديث و نعي مقتل اولاد مسلم ع -------------------------------- | مجالس ومحاضرات مكتوبه

حديث و نعي مقتل اولاد مسلم ع
---------------------------------------------------

*عندما اتت زوجة الحارث الهمداني قرب نهر الامسيب رات اثنان من الاطفال هاربان .. فاحطان .. جياع .. اخذت تسئلهم من انتم و ما بالكما ... اخذا يقصان ما جرى بهم كأني بلسان حالهم ......... *



يخالة احنا التعبنة وكتنة
جينة من حرگو خيمنة
وشفنة الخيل سحگت صدر عمنة
وفوگ الهضم تالي انسجنة

مسجونين محد رحم بلحال
و تدرين اليتم لو مر على اطفال
والله يخالة الهضم جتال

ترانا يخالة ولد مسلم
صغار واحنة انريد نِسلم
دلالنة من الهم تثلم

والله يخالة شلون بينة
و امنة ما تدري علينة
شسدة واهلنة امضيعينة

جينة مفرفحين و بلا اردان
اندور عسن نلگالنة احنان
واحدنا من الضيم تعبان

تعبانين يخالة اجينة
ارحمي حالنة لخاطر بجينة
واجرج على الزهرة و نبينة



* عرفتهم وضمتهم الى صدرها واخذت تقبلهم وتبكي واخذتهما الى منزلها اوتهما وقدمت لهم الطعام والشراب فلم يأكلا كأني بلسان حالهما ....*


ترانا يخالة كلشي منريد
نريد الخلاصة من بني ايزيد
دربنا تراهو كلش ابعيد

شحال اليتامة الروعوها
وتريد يحظرها ابوها
شجاها الخلك مايرحموها

شنهو السدة منهم الاولاد
اصغار و ايذوبون الافاد
منهو اليرد بيهم للابلاد



* كانا تعبين فناما واذا بلكبير افاق من نومته واخذ يبكي و يخبر اخاه انه راى اباه وجده رسول الله في منامه ويقولا العجل العجل الينا و يقبلانهما في جبينهما كأني بلسان حالهم .... *


بلضيم ضلينة يبونة
والناس مايوم ارحمونة
نريد اهلنا الدللونة

شبعنة ترا ذلة ومهانة
عمت عين الزمان الضيعانة
بلوة ابصغرنة شو بلانة

بلوة التدحرجنة اعلة بلوة
محد نلاگي بي امروة
ايامنة راحت الحلوة

تحملينة اهموم مُرات
غابت شمسنة وعدمن انبات
و انريدكم يهل الكلافات

نريد احباب و انسير عليهم
نبجي وعلى همنا نحاجيهم
ويمسحون الدمع همة بديهم



*في هذه الاثناء سمع الحارث بكأهما فأخذ بسحبهما وكتفهما واخذهم للذبح كأني بهم ..... *


خايب يحارث اسمع شبيك
ارحمنا وباجر نجازيك
نبيك باجر يلتفت ليك

مذبوحين احنة صاير ازمان
من شاهدينة روس الاحنان
افهم ترانا اولاد عدنان

ارحم يخايب صغر سنة
و خلينا نمشي لوطن جدنة
بعدنة ما تهنينة بعمرنة
و انلاگي بلكي هناك امنة

تدري الاميمة شكثر تشتاگ
هسة كلبها اضن حراگ
هد حيلها الاحبيبة الافراگ

اذبحني بس عوف اخوية
اسمعه يريد اليوم ابوية

ياذباحهم هونك عليهم
امهم ترا ماتدري بيهم
كلي على الذلة شبديهم

صاحو بكل غالي ترا احنة نحلفك
فك اقيودنة و علنبي اجرك
حيدر باجر ايصير الك خصمك

ياذباح خلي انروح لمنة
اطلب وشتريد اليوم منة
والله ترا احنة تعذبنة

على نهر الامسيب هلذبحهم
اصغار ولا بدر كل ذنب منهم
الله يعين الضيعتهم

-------------------------------------------------------
*بقلم خادمة اهل البيت ع آلــشــا؏ـرة وآلمـلا رغــد آلـبــھہادليِہ*
ذمة عدم حذف الاسم وغير مبرئ الذمة كل من ياخذ من الكلام وينسبه له


https://t.me/joinchat/AAAAAD_jZ91aGoyFcWUhng
قناة مجالس ومحاضرات مكتوبه

كروب قصائد والحان منبريه اشترك
https://t.me/joinchat/AAAAAD7f0FNmkN2JjlNIBw