قال: -كنت في العذابة دائمًا بجي متأخر بطبيعة شغلي الكانت بتخلص | بوفارديا🌷Bσυναя∂ια
قال: -كنت في العذابة دائمًا بجي متأخر بطبيعة شغلي الكانت بتخلص في زمن متأخر، فلمن أجي البيت متعود أشرب لي قهوة وأصحى شوية كدا أفتح التلفون وأشوف الحاصل شنو حتى أنوم، فلمن أجي أعمل قهوتي ما بلقى كباية نضيفة، فبقوم بغسل العدة كلها مع كُبايتي لمن انتهي، والموضوع استمر فترة كدا، وفي يوم جيت تعبان ونمت طوالي بدون حتى أشرب قهوتي، فلمن صحيت لقيت البيت كلو داقي جرس فيني العدة دي مالها وسخانة، وأسي نقعد نعمل الشاي ولا نغسل العدة..
قال : -يوم جيت من الشغل، ولقيت ولدي نايم والتلفون في وشو، فلمن شلت التلفون لقيت البطارية ضعيفة، فقلت بالمرة أخت ليو التلفون في الشاحن، فصحى الصباح لقى تلفونو مشحون فشكرني جِدًّا، ولكن للأسف هو اعتاد ع كدا، فبقيت يومي أنا بخت ليه تلفونو في الشاحن لحدي ما في يوم نسيت! فلقيت ولدي بشاكل فيني وبقول لي أنا كنت معتمد عليك وأسي أنا طالع أعمل شنو وتلفوني فاضي..
قال: -كنا ٣ أصحاب وقررنا نفتح محل ونعمل بزنس خاص بينا، والحمد لله بدينا بداية كويسة شديد، بس للأسف الربح كان بسيط الفترة الأولى، وشوية أصاحبي الاتنين كان وضعهم المادي صعب، فكنت بقول ليهم أنا م عايز نصيبي خلو معاكم، وكملوا باقي المشروع، وفي فترة بسيطة المحل بقى مشهور والدخل حقهُ بقى عالي، وصادف إني الفترة ديك كنت ماري بضائقة مادية صعبة، فاضطريت اتصلت عليهم وقلت ليهم عايز نصيبي الثابت من دخل البزنس، فلقيت ردودهم فيها تذمر وزهج كدا، وبقو ينظروا لي نظرات الزول الدخيل عليهم.
-ببساطة كدا الاعتياد بخرب الطبع، فمهما كانت علاقتك مع زول قريبة ما تخليهُ يتعود على البتعملهُ كإنو حق من حقوقهُ، حاول وريه إنو دا منك ومجرد حاجة ذوقية عشان ما يجي يوم وتكون إنتَ الخاسر عشان بس كنت ليين في فترة من الفترات، وإتذكر إنو حُسن التعامل أخلاق ما اعتياد والبتعود عسلك اليوم بكرة بحملك طعن الشوك.
