ماشة في الجامعة وفي جزء من الجانب الأيمن في ملابسها اتشرط وهي | بوفارديا🌷Bσυναя∂ια
ماشة في الجامعة وفي جزء من الجانب الأيمن في ملابسها اتشرط وهي ما واعية بيه، فأول ما جات داخلة القاعة في بت انتبهت لي الموضوع.
فجأة كوركت ليها وبصوت لأنها كانت بعيدة منها ونبهتها إنو ملابسها اتمزقت، الناس كلها ركزت معاها، حتى الما كان جايب خبر، البت اتحرجت وسرعة سرعة قعدت جنب أقرب مكان ليها عشان تتجنب الحرج، لحدي ما لقت حل للمشكلة.
لمن سألت صحبتها لي عملتي كدا، قالت ليها مالي كتر خيري نصحتك بدل الناس الشافوك وما اتكلموا.
السيناريو بمثل ناس كتار بس بمواقف مختلفة.
صحبك النزل بوست وفيه غلط، بدل تقول ليه تمام وتشكرهُ على المحتوى جريت طلعت ليه الغلط الإملائي ومعاو نجمة.
زميلك في بيت العذابة، النسى ما دفع حق الإيجار، أول ما جاء خاشي قلت ليو شنو يا فضلت إنتَ م دفعت ومالك عامل رايح قِدام الباقين بدون م تعرف ظروفهُ، حتى لو كنت عايز تنبههُ.
-صحبتك الشعرها طالع برا وبتقعدي تنصحي فيها قدام باقي الشلة كل مرة لمن تلاقيها بحجة أنها لازم تتعدل.
أي نعم دا نُصح زي ما ظاهر، بس بالنسبة للطرف التاني توبيخ، مهما كنت بتحب زول ما تنصحهُ على الملأ عشان ح تكون صنعت منو مسخرة بس ما أكتر.
احتفظ بنصحك وخلي على إنفراد دائمًا، واتذكر إنو أي نصيحة ينفع تتقال بس ما أي وقت ينفع للنصيحة.
ولو كمان بتحب الشعر ح أديك أبيات لطيفة للإمام الشافعي رضي الله عنه تلخص كل دا وهي:
تَعَمَّدني بِنُصحِكَ في اِنفِرادي وَجَنِّبني النَصيحَةَ في الجَماعَة
فَإِنَّ النُصحَ بَينَ الناسِ نَوعٌ مِنَ التَوبيخِ لا أَرضى اِستِماعَه
