جديات من طالب بهالوقت الحرج يجي و يگلي ماكو واهس و معنوياتي | ملازم السادس الاعدادي 2023
جديات من طالب بهالوقت الحرج يجي و يگلي ماكو واهس و معنوياتي هابطة، ما انقهر عليه لا و إنما اشفق عليه و الله.
بله ليش واهس ماكو اجاوب اني؟ اوك
طبعًا، اذا مخلي ايدك على خدك و دتفكر بكمية المواد المتراكمة العندك و بدل ما تستغل الوقت بدراستهن، لا..تجي تدگها صفنة شلون راح تبدي،، ابقى هيج و غمض فتح تجي الامتحانات و انت ما مكمل المواد.
و طبعًا، اذا انت ما مخلي كروب من كروبات السادس ما عاتبة عليك، اذا ما داخل بيهن، و ما ضل قناة بالتلي ما دخلتها و تسمع الإشاعات من هنا و من هنا لااااا و المشكلة مصدكهن فلان يتوقع موعد الامتحانات و فلان يتوقع الدخول الشامل و فلان يرشحلك مراجعات مركزة خاف تضيع وقتك بالصفنة و ما تلحك تكمل موادك، عود و الله هاي المراجعة المركزة تأخذ عليها 100 بلا تعب.
و طبعًا، اذا انت عايف تراكماتك و دتقارن بينك و بين زميلك الي بده مراجعة و انت بعدك ما كملت نقوصات و هالشي بحد ذاته راح يدمررررك حرفياااا
حجيت كلمة غلط؟ مو هذا واقع الأغلبية من عدكم؟صح لو لا؟
بابا اصحه الوقت ديروح اكو طلاب اكلوهن للكتب و انت بعدك تصفن! ليش؟ مو باجر عكبه تجي النتائج و تندم عالوقت الي ضيعته هباءًا منثورًا.
شنو المفروض اسويه؟ اجي اجيب كتبي و ملازمي و اسويلي عالم خاص بيه و ما علي من غيري بده مراجعة لو ما بده كمل مواده لو ما كمل، علي من نفسي فقط وأتخيل فرحة النجاح وأهلي فرحانين الله شگد حلو الشعور احط هدفي و ثقتي برب العالمين كدامي، و ثقة اهلي بيه و اقره و ابذل طاقتي كلها، راح اتعب بما تعنيه الكلمة من معنى ميخالف المهم ما اخلي مكان لتأنيب الضمير و لا مكان للندم يوم لا ينفع الندم، هذا الطالب الي يدور مستقبل نقطة رأس سطر....