2022-07-30 23:27:51
قال :
"كنت بايت في المستشفى مع قريبي و حصل موقف غيّر فيني كتير و علّمني درس ما حنساهو .
راجل جاب ولدو المستشفى مع أخوانو (أعمام الولد) ، و كان واضح انو في مشكلة حاصلة بين الأب و ولدو ، الولد تعب و ده سبب جيّتهم هنا ..
الأب ظاهر عليهو انو ما متأثر نهائي و الموضوع ما فارق معاهو ، جاي بالقوة غصباً عنو و منتظر القصة دي تنتهي عشان يرجع بيتو ينوم و خلاص !
تابعت الأب من لحظة وصلو في الشارع ، غصب عني بقيت اشوف الحاصل شنو ، الأب جاتو مكالمة في التلفون و قعد يكورك و يصرّخ و يقول :
عذّبنا كل يومين يعمل نفس الحركة و نجري بيهو المستشفيات ، مكالمة طويلة مليانة قسوة و كلام حار .
و أكتر جملة لفتتني في نص الكلام :
(أنا عايز أطلّعو راجل عشان كده بطلّع قسوتي فيهو ، حنتفاهم و أطيّب خاطرو لمّن يطلع و نمشي البيت ) .
بعد ساعات جاء راجل من الأمن و نادى الأب بي اسم ولدو ، وقال ليهو : (البقاء لله)
اللحظة دي اتحولت كل القسوة ديك لي بكاء و صريخ شديد ، الأب بقى يقول :
خلاص والله الموضوع انتهى ، قولو ليهو أنا ما بزعّلو مني ، ما حضايقو ولا حاضربو ، أنا غلطان والله كنت قايلو كذاب لمن بقول قلبي واجعني يا أبوي من تعاملك معاي
كان نفسي أمشي ارفعو مع الناس الحولينا لكن غلبني أتحرّك ، قلبي اتقطع على الولد المسكين اللي عاش حياتو القصيرة دي في العذاب !
كان نفسي أصلو في مكانو و أقول ليهو :
عرفت كده انو الدنيا دي رايحة ؟
عرفت إنها ما بتدوم للأبد ؟
ولدك مشى و ما حتلقاهو تاني عشان تكسر خاطرو
..
الدنيا دي ما دايمة يخوانّا ، ممكن في كسر من الثانية كل الموازين تتقلب و تتغيّر .
اللحظة اللي بتعدّي ما حنقدر نرجّعها ، و اللي بيتكسر ما حنعرف نصلّحو .
القسوة بتولّد القسوة ، و الحياة ممكن ما تدّينا فرصة تانية نصلّح اللي عملناهو.
الأب ده رفض يراضي ولدو و بقى مؤجّل الموضوع لحدي ما يرجعو البيت ، لكن رجعو بيهو معاهم و هو جنازة !
عامةً نبقى مصدر أمان و فرح و خير للحولينا ، و خاصةً لي أطفالنا و أولادنا ، نخلّي القسوة و نحوّلها لي طمأنينة ، و نبقى ليهم سنَد عشان ما يفتّشو برة بعيد مننا .
ولازم نعرف انو الزول الطيّب ما عوير ، و الحسّاس ما عبيط !
و اللي بتكون دمعة عيونو قريبة ده إنسان حنيّن و قلبو رهيف وصفو الحبيب المصطفى ﷺ بي انو (قلوبهم مثل أفئدة الطير) ، من اللي حيدخلو الجنة من غير حساب ، يا بختو و هنيّالو
فاللهمّ هذا قلبي تعلم ما يُخفي وما يُسِرّ ، املأه جبرًا و فرحًا فأنت السّلام قادرٌ على كل شيء
#بيوت_متطمنة
ممكن نصلّ على الحبيب!
#تيسير_الصادق
https://t.me/tayseerelsadigo
367 viewsأُمْنِيَّة, 20:27