خلونا نتفق إنو حاليًا بين البنات بقت منتشرة وبكثرة ظاهرة "الانبراش" زى ما بسموها أو "الكراش". تلقى الوحدة في الفيس وقدام الملئ، تعلق على صورة ولد بتعليق عديمة الحياء! وأنا هنا لمن اقول" عديمة الحياء" ما معناها المقصد حاجة بتمس الشرف أو ما شابه. : كونكِ تعلقي في بوست منزلو راجل أو في صفحة وتقولي "سماحتك تلخم" عدم حياء. كونكِ تعلقي وتقولي "عرسني ونفسي اكون مرتك" عدم حياء. كونكِ تعلقي وتقولي "ده كراشي يا جماعة" ده عدم حياء. وكونكِ تشوفي راجل في الشارع وتقعدي تعايني فيهُ وتفصليهُ وتتعجبي بيهُ مع صحباتك ده عدم حياء من نوع تاني خالص. أنتِ كـ بت دام الحياء إنخلع منك وبقيتي بت جريئة، تاني الفضل شنو؟ أنتِ كـ بت زينتك حياءك واحترامك لذاتك وتقديرك لربك ولأهلك ولنفسك : سيدنا موسى - عليه السلام - لمن طلع من مصر إلى مدين؛ والتقى بفتاتين عند مورد ماء مدين وساعدهن وسقا لهن الأغنام، قعد تحت ظل شجرة يناجي ربو. ففي أثناء جلوسهُ جاتو وحدة من الفتاتين تمشي على خجل و"استحياء" وأدب، عشان تكلموا بأبوهم العايز يشكرو على مساعدتهُ ليهن. سبحان الله، ذُكرت هذه الفتاة في القرآن الكريم بوصف مفروض كُل وحدة تقتدي بيهُ، قال اللّٰـه تعالى : {فَجَاءَتْهُ إِحْدَاهُمَا تَمْشِي عَلَى اسْتِحْيَاءٍ قَالَتْ إِنَّ أَبِي يَدْعُوكَ لِيَجْزِيَكَ أَجْرَ مَا سَقَيْتَ لَنَا...}
#وعلـى_مشـارف_الوصـول إنتِ كـ بت زينتك هي حياءك وخجلك وادبك. ونستك مع الرجال حيقلل من حياءك. عدم غض بصرك عن الرجال حيقلل من حياءك. اعجابك بالغاشي والماشي ومجاهرتك بالمعصية حيقلل حياءك. : لو معتقدة انو ونستك وضحكك ومعاملتك مع الرجال حتحببهم فيك وواحد منهم حيتخذك زوجة، صدقيني حتكوني خاته نفسك في كذبة حتخسرك كتير. صديقني اي واحد حيكون بفتش عن زوجة مستقبلية لازم يكون عندها حياء، لأنو هو حيختار شريكة لحياتو وأم لأولادهُ وركيزة وعمود قوي ومتين لبيتهُ، ويقدر يكون مطمن وواثق تماماً إنو عندو شريكة حياة عمرها ما حتعاين لغيرو. فعمرو ما حـ يعاين لواحدة مرخصة نفسها لي اي واحد وتتكلم مع ده وتنبرش في ده.
