السلام عليكم دفعه 2004 كيف حالكم اليوم باذن الله حناخدو اول | Improve ur English [ sireen_2005]

السلام عليكم دفعه 2004
كيف حالكم
اليوم باذن الله حناخدو اول زمن فاللغه الانجليزيه
الي هو " present simple "


اول شي حناخدو القاعده
بعدها حنترجموها
و نشرحوها
وامثله تسهل عليك المعلومه
وناخدو هوم ورك بسيط جدا
ونقولو بسم الله
ركز معاي

قالك يا سيرين اني نبي نعرف شن معنى عنوان الدرس ؟
( percent simple)=( المضارع البسيط)

قالك يا سيرين حني لي شني نستعملو فيه زمن المضارع البسيط؟؟

والله يا طالب القاعده قالت ان ال ( present simple )
حني نستعملو فيه لما نبو نتكلمو على

[ ] ( facts and habits)
(اي بمعنى لما نبي نتكلم على عاده اني ندير فيها يوميا او حقيقه اي شي حقيقي مستحيل يتغير)

حتقولي مفهمتش يا سيرين شن معناه الكلام هادا؟

تعالا نقولك شن معنى عاده
ركز معاي

انت مش كل يوم تمشي المدرسه؟
مش كل يوم تجلي في سنونك؟
مش كل يوم تقرا؟
مش كل يوم تصلي؟
هادا كله شني ؟

( هادا كله عادات )
زي ما قتلك في قاعده

باهي يا سيرين اني قاعد مفهمتش شن معنى حقيقه او شي مستحيل يتغير ؟
اوو تعالا نقولك
نعطيك مثل بسيط يخليك تفهم شن معناه الكلام هادا

ليبيا عاصمتها شني؟
طرابلس
باهي عاصمه ليبيا تتغير؟؟
حتقولي لا طبعا
اذا هادي تعتبر شني حقيقه او شي مستحيل يتغير
ريت كيف

فورمت توا ولا؟
و عرفت لشني نستعمل ال
( percent simple)

باهي يا سيرين اعطيني التركيبه متاع ال ( present simple )
وكيف نقدر نكون جمله بيه

ركز معاي
القاعده تقول ان ال ( present simple )
لما نبو نكونو بيه جمله نحطو

( subject + verb)= ( ضمير + فعل)
لاكن بشرط زي ما قلنا فوق في قاعده
ان ضروري نستعمله لما نبي نتكلم على روتين او حقيقه اي شي حقيقي مستحيل يتغير


مثال
( I walk to school every day)
( انا اذهب للمدرسه يوميا )
ريت كيف
حطيت
( subject + verb ) و كملت جملتي و تكلمت على عاده اني ندير فيها يوميا

توا هكي درت جمله في الاثبات
نبي نتعلم كيف ندير جمله في النفي؟؟

القاعده تقول ان في حاجه اسمها
( do , does)
الزوز هادو نستعملو فيهم في
( percent simple)

تعالا نشوفو القاعده شن تقول

( subject + ( do , does + not)+( verb)
( ضمير+ ( do, does) + فعل)

ال (do ) نستعملو فيها مع
(I , you , they , we )
وال ( does)
نستعملو فيه مع
(She , he , it)

هي تعالا نكونو جمله منفيه بنفس الجمله الي خديناها مبكري
(I don't walk to school every day)
( انا لا اذهب الى المدرسه يوميا )
ريت شن درت هني
حطيت ضمير بعدها ( dont ) و بعدها فعل
وهادا هو بس

توا تعالا نكملو جمله ب
( does)
حنحطو نفس جمله لاكن بدل
( do ) حنحط
( does)

( she doesn't walk to school every day)
( هي لا تذهب للمدرسه يوميا )
حتقولي يا سيرين علاش حطيت
( does) مش ( do)
اوو
مش قلنا حني لما يكون عندي
( she ) نحط ( does)
ولما
( I, we , they, you)
نحطو
(Do)


ريت كيف الدرس حلو وبسيط
طبعا الدرس هادا هلبا طويل و مهم في نفس الوقت
حنكتفو بجزء هادا بس اليوم
بش متتلخبطوش
وباذن الله غدوه نكملو الباقي
ركز معاي في ريكورد لان بنشرح حاجات مهمه
عاود الريكورد مره اتنين تلاته لين تفهم

وزي ما قلنا شعارنا هو
#سنصل_للقمه_سنصل