صاحب الهم لا يلام على همه زي ما صاحب المرض لا يلام على مرضه .. | جَنْزَبِيِلْ ~🌨️🍃

صاحب الهم لا يلام على همه زي ما صاحب المرض لا يلام على مرضه .. والقلب المهموم مش بعيد عن ربنا لكن مطلوب منه يقرب بالإيمان والتوكل عشان يطلع من همه

حالة الهم للمؤمن هي حالة المؤمن مأجور عليها .. لكن مطلوب يطلع منها

زي المرض .. المؤمن مأجور في مرضه لكن مطلوب منه يعالج نفسه عشان يطلع من الحالة دي بقدر استطاعته

وزي الفقر المؤمن مأجور عليه لكن مطلوب يسعى للغنى والعفة

المرض ابتلاء جسدي والفقر ابتلاء مادي والهم ابتلاء نفسي

الرسول صلى الله عليه وسلم كان بيستعيذ من الهم والحزن .. زي ما كان بيستعيذ من المرض .. وزي ما كان بيستعيذ من الفقر

مع إن كل الحالات المؤمن مأجور عليها .. لكنها حالات شاقة على النفس وممكن تهلكها

مهم جدا ان المهموم يعرف إنه مش مغضوب عليه بحالته دي .. وإلا مكانش من تكفير الذنوب "الهم" .. والأهم انه يعرف إن مطلوب منه يطلع من الحالة دي

الخلطة هنا فيها تركيبة من ٣ عناصر .. الرضى .. وقفل باب الشيطان (انت طالما مهموم تبقى بعيد عن ربنا فيوديك ليأس) .. والسعي لتقوية النفس وعلاجها من الهم

وعلاج الهم التوكل .. والإيمان .. والثقة بالله

وزي ما قلنا نقرب المثال بالمرض والفقر

انت مطلوب ترضى بالمرض والفقر .. ومطلوب ما تيأسش بسبب المرض والفقر "وَأَمَّا إِذَا مَا ابْتَلَاهُ فَقَدَرَ عَلَيْهِ رِزْقَهُ فَيَقُولُ رَبِّي أَهَانَنِ .. كلا" .. ومطلوب تتعالج من المرض وتخرج نفسك من الفقر

راضي بالهم .. مقتنع انه مش سبب لليأس .. بتغيره وشغال عليه

وإهماله زي إهمال المرض ممكن يأثر بمضاعفات كارثية

والعلاج منه واجب

ومع إن الكلام ده ممكن مايعجبش ناس كتير إلا إن الخروج من ضيق الأرض يأتي من سعة السماء

وسعة السماء بنوصل لها بالعبادة

وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ
فَسَبِّحْ بِحَمْدِ رَبِّكَ وَكُن مِّنَ السَّاجِدِينَ
وَاعْبُدْ رَبَّكَ حَتَّىٰ يَأْتِيَكَ الْيَقِينُ

#ميزان_الحياة
#بهاء_الدين_سيلمان