2022-03-07 22:17:37
مُهداة الى الشاعر الفلسطيني
محمود درويش
قصيدة "تأملات على باب الخلود"
بقلم محمد الركابي
رسم لوحة سؤاله بطين حريته
الوان الرسم دمه وخضار الناصرة ولعب الاطفال وضحكه من حيفا
البياض من القدس لوّن الطين وشب شعر مثل الرصاصة گبال نجمتهم
السواد احزان ناسه وحلم كل نثيه تريد تعرس بگيعان مابيها وجه غاصب
بچه..واكتملت اللوحة وشال العلم بآخر صوت
بي من ذكريات الطين
بي عيسى المسيح ووردة النسرين
رفرف گلب ناسه اهناك من طب للقدس فاتح شعر ويريد يكتب كل قصيدة اسلاح
شاف الناس بيها من الحقيقة الوان
كال اشهد يرب الكون هاي الناس ديني اليذبح السلطان
عهد لا "لست وحدك " كلنه نضوي اوياك
كل نجمة بوطن للعرب تضوي وياك
بدم تشرين نضوي وياك
فك باب الگبر وافرح...لاتتأسف بظلمة عدم وتگول
وين نروح
كل انسان عايش نبضه للثورة خلقلك روح
"على هاي الأرض مايستحَق طولك "
هضيمة ابعيد عن ناسك
تدگ ساعة الغرفة الطايره بجنحان وكت الليل
تنزف بالزمن والهاتف گبالي اسمعك
چنگ اگبالي وتسولفلي
تگلي محمد الشاعر اذا مو للتمرد باب مو شاعر
تگلي محمد الثائر اذا مو چفه مامتعوب مو ثائر
واسولفلك على البية حزن شاعر حظه بشاعر
عفت اللوحة يم ناسك وعفت ارض المسيح وروضة الأديان
اجيت لغرفتي مثل الوحي السكران
واصدق مايگوله الله اذا چان الوحي سكران
وانه وياك ثالثنه صدگ" ورقه بن نوفل" نكتب القرآن
سافرنه بزمن مايشبه الأزمان
عدلنه العثار التارس التاريخ
كتبنه "بسورة الإنسان"
كل انسان مايكره بشر عاللون لو عالدين لو عالبلد هذا انسان
كل انسان مشكلته حرب نفسه ويعوف الناس.. هذا لكل نبي عنوان
كل انسان يلبس معطف الرحمة ويحب الناس
هذا الجنة تندالة بعطر ريحان
وانه وياك..واحلام المجانين الوحي الثاني
و"خذينه الحكمة" من فوضى الرصيف وچف المسودن
من تدور بحزن الرصيف تشوف... سجل كل اولياء الله
بدشاديش وشيَل واهدوم كلها اتراب
مايتگرب الرحمن يم السبحه والصاية وحچي الجامع
ورحت وياك يم گاع الجليل وشلت چف ايدي
گلت هذا الخليفة اليحترگ بعدي وصرتلك للجمر عنوان
زرعنه الحنطه والثورة على الكيعان
كل اسمر تدفنه الگاع يعمر شجرة الإنسان
من فزيت شفت الهاتف وصوتك وشفت الگاع
گلت هاي الأحلام التبني كل انسان
محمد الركابي
131 viewsعلي عادل, 19:17
ج
