2021-09-08 13:05:01
ملخص لكتاب:
بخصوص بوست امس ناس واجد طلبت مني زبدت هالكتاب الايام هذ مش بداية السنة الجاية .
ف اهم نقاط طلعت بيهم وطبقتهم حاليًا + بوست طويل بكل * بس حرفيًا مكتوب في نقاط حاتنفعكم + ع قرب السنة الدراسية حانشاركه من جديد عشان ينفعكم او ديروله save
اول نقطة : متخليكش انسان روتيني زيادة في حياتك لأنه الروتين ينتج عنه ملل وكسل زايد
+ خليك انسان كل فترة تجدد عقليتك وحياتك .
ثاني شي التعلم فيه ثلاث طرق واعتقد اغلبنا يطبق فيههن لهوا التعلم البصري: تكون انسان تحب تقرأ منهجك بعيونك اكثر ما تتحرك او تقرأ بصوت تحب تتمعن فالورقة بعيونك وتركز
-تعلم الحركي: تكون تقرأ وتمشي وتتحرك و تتمشي وتحكي مع نفسك هك وعايش الدور
-تعلم السمعي: تحب تقرأ بصووت عالي وتعاود وتزيد كل شي تقرأه لازم بصوت عشان تركز
شوف نفسك اي نوع تستخدم وطوره وخليك فاهمه كويس مثلا زي البصري عشان دماغك ميسهاش دير الوان للكلام المهم و تمعن فيه كويس و حطله خطوط واجواء هك عشان لما فالامتحان تغمض عيونك فعليًا يكون دماغك مخزنة .
شي اخر شوفوا تلخيص النقاط هذ من ناحية الدراسة *
اول شي خصص مكان للدراسة فقطططط حانقولك ليش دماغك طبعه كسول لو جيت قريت في مكان فيه تلفزيون دماغك مش حايتفاعل معاك بكل يقولك المكان هذ للتلفزيون والهدرزة كيف تبيني نركز معاك يا باشا؟
برضوا تجي لطاولة المطبخ تقرأ عليها حاتلقى دماغك مركز مع لخاش ولطالع ومستحيل تقرألك سطرين
ف خودلك دار هادية فاضية اضاءتها كويسة و مريحة الهواء يخشلها مش مضغوطة + تسدك وتسد كتاباتك وحوستك ومفيهاش اي مصدر ازعاج او تشتت (هدرزة ، تلفزيون ، نت وفونك )
وقتها دماغك يقول مفش حل إلا نقرأ لأنه مفش شي يشتتني ولا يزعجني .
حددنا مكان لقراية تمام اول اسبوع لا ارادًيا بمجرد ما تدخل المكان هذ دماغك يقولك هي نقروا لأنه مكاااان للدراسة فقططط*
حددنا المكان لنقروا فيه تمام
ممكن النقطة لحنحكيها توا حاتكون تافه شوي بالنسبة لك يا اسطورة النجاح ولحاب تكون عبقري الدفعة
التأكيدات الايجابية يا خوتي وخواتييي
ارجوكم احكوا مع دماغكم متهزوش ع النقطة هذ احكوا معاه كلام ايجابي حتى لو الكوكب كله حتى لو الوطن العربي كله متفق انك انسان مش حايصير منك انت اؤمن بدماغك ونفسك
قوله ( انا حانجيب المعدل لنبيه ، انا انسان ناجح ، انا حانحقق لفي خاطري فيه ، انا حانقدر نذكر اي معلومة قريتها وبشكل سمح وحانجاوب )
هدرز وخود واعطي لا اراديًا حاتلقى نفسككك متنهد و خاش بقوة ع الكتابات لقدامك لأنه دماغك اتفق معاك فعلاً انك هك .
تمام وتينا دماغنا والمكان لحنقروا فيه بعدها ؟
حدد افكار جلسة الدراسة دير ليستة قائمة الافكار ولتكملها شطب جنبها بمعنى
اليوم عندي
واجب عربي
ورقة عمل
امتحان رياضيات
شن استفدت انا يا هاجر ؟
حانقولك شن استفدت استفدت انك
بقيت انسان منظم ، خففت هرجة ودوشة دماغك ورتبت امورك ومانسيت شي ، وحسيت بالانجاز لأنك درت القائمة هذ وانجزتها .
لتوا متفقين وتمام
توا بنبدأ في مادة معينة نقولوا مثلا مادة التاريخ
اول شي اي مادة بتبدأ فيها متبتدش وانت متعقد ومش طايق الكوكب البشري كله
تذكر التأكيدات الايجابية لحكينا عليهن ، صلي ركعتين هك عشان ربي يفتح عليك وتهدى
بعدها؟
اول ما تفتح المادة متبدأش دغري فالدرس لقدامك عشان حاتكون بطيء + مش حاتطلع ب ولا معلومة متذكرها !
باهي كيف بندير؟
اول شي نصيحة: خليك انسان تقرأ اول بأول *+ كل فترة راجع ع المنهج او كل نهاية اسبوع حايفرق معاك واجد صدقني *
لو مقريتش اول بأول دير (القراءة السريعة) بمعنى اقرأ عنوان الباب ، بعدها عنوان درس مر عليه مرور الكرام تذكر الافكار لمتذكرهم من الحصة هذ لنشرح فيها الدرس ع كم موقف حكاته ابلتكم بشوي بشوي مر عليهم كلهم وراجع فدماغك شن لمتذكره من لباب هذ وثابت وراسخ فدماغك حاتلقى معلومات لأباس بها وهذ شي كويسس بكل .
بعدها تقدر تقرأ المادة وتوا طقيت في ورقة مهمة وفيها اسئلة واجد ؟ طقيت تمام
خودلك نوتات عبيهم بالكلام المهم ع طريقة اسئلة mcq حاتفيدك وتنفعك واجد بكل + معلومات مهمة جاية فوسط الكلام خودهن واكتبهن فالنوتة وعلقها فالورقة
بحيث لما تجي تراجع حاتلقى الورقة هذ داير عليها اسئلة ومعلقات فالورقة تهيالي وقتها حاتفوت الورقة وتركز ع لكاتبه انت بنفسك.
ثاني طريقة نصيحححة خليكم ع الخرائط الدهنية ، كيف هذ؟
قاعد تقرأ في قطعة من مادة ومش خاش دماغك او خاش بس بتسهلها ع روحك دير خريطة مثلا فالنص دائرة فيها اسم الشي لحاب تقرأه والتفرعات يطلعن من الدائرة هذ وفيها المهم نعتبروا الشي هذ شخصية معينة بندرسوها يكون اسمه فالدائرة الكبيرة والتفرعات (عمره ، مكان ميلاده ، لقبه ، شن دار ) وهكذا
287 views10:05