الشاعر محمد حسن ضيغم

2022-08-19 11:19:47 بس رحتووا اضلمّت دنياتي
شلت ايدي ونزلت دمعاتي
الله وياكم ... ما انساكم
شلت ايدي ونزلت دمعاتي
................
اوّل ما شفت ضعن الاهل غرّب
كَعدت ابابي ابجي بحركَتي وانحب
اكَولن راح كلشي بروحتج زينب
يعمّه اخلافكم تدروني اتعذّب
ما احمل فركَتكم والله
وماشوفن باجر عبدالله
هدني اجفاكم ... ما انساكم
شلت ايدي ونزلت دمعاتي
................
مكسورة كَلب ضليت بدموعي
ومثلي بكل مسيّه تبجي اشموعي
احس نار الهجر ماترحم ضلوعي
وكتبت اعله الترب بدموعي موضوعي
جف اكتب بي كل مأساتيي
وجف امسح بي كل دمعاتي
بدون اضواكم ... ما انساكم
شلت ايدي ونزلت دمعاتي
................
زغيره وسافروا كل اهلي من يمي
وكَبل بيهم ازيحن لوعتي وهمي
جنت افرح اذا ناده الابو بأسمي
وصرت بعده بمصيبة لوعتي وغمي
ياوالد ارجع لبنيتك
تدريها ازغيره امتانيتك
وبليّاكم ... ما انساكم
شلت ايدي ونزلت دمعاتي
................
شلت ايدي ودمعتي اعله الوجن نزلت
المصايب وي مسير اضعونهم حلّت
احس روحي وي زينب للطف ارتحلت
غيبة اهلي آه ابكَلبي اشخلّت
عيني اعله الباب وأتنطر
يرجع محبوبي الّي اتأخر
والله اهواكم ... ما انساكم
شلت ايدي ونزلت دمعاتي
................
يربي شلون بيّه لو جره المحتوم
من نحر الابو بالطف تسيل ادموم
ووجه عباس يبقى اعله النهر مرسوم
وسبايه اضعون اهلنه اتروح بيد الكَوم
الجان يرف أبجفّه الوانه
بس يطيح ايشب صيوانه
تسيل ادماكم ... ما انساكم
شلت ايدي ونزلت دمعاتي
................
الشاعر محمد حسن ضيغم باز کردن / نظر دهید

2022-08-19 11:18:57 ياحسين ياحسين يا اباعبدالله
ـــــــــــــ
ياحبيب الدنيه كلهه ... وجننت كل الخلكَ
يبقه مايندل طريقه .. العن تعازيك افتركَ
لولاك ابراهيم والله ... بنار نمرود احترك
هذا كَبي وكل كياني ... غيركم لا ماعشك
يالحبيب .. خل اضل مجنونك
يالحبيب ... ارزقني فيض اعيونك
يالحبيب ...عبدك امسمَيني
ـــــــــــــــــ
شكثر لاموني اعله عشكَي ... ومااهم كلمن حجه
هم يحس عايش حياتي ... الماون اعليك وبجه
لا وحك ذيج الي بالطف ... ثنين اديهه شابجه
من كثر هاي المجالس ... كَلبي ما مرّه شجه
ما اريد ... عمري لحضه ابدونك
ما اريد ... اطعمني من ماعونك
مااريد ... دنيتي تشريني
ــــــــــ
هي كل لحضه التمرني .. بلا ذكر حسره تضل
وادري كل ايامي لوما .. انت احسبهه جهل
شماردت استغفر انه ... اقره هذا المستهل
مجلس حسين وعزائه ... للخلك اشرف عمل
اليهواك ... ترضى عنّه الزهره
اليهواك ... هذا حضه شكبره
اليهواك ... صاح آه يحسيني
ـــــــــــــ
اتشرّفت خادم جبتني ... وخادم انه للخدم
اتشرّفت بين الخلايك ... شلت بجفوفي علم
مثل ما انفاسي تصعد ... نزّل بروحي الالم
وخلني كل يوميه اريدن ... يذبح ابنحري السهم
يحسين ... عمري فدوه العمرك
يحسين .. نحري فدوه النحرك
يحسين ... انت سر تكويني
ـــــــــــــ
يامن ابكربله شاهد ... نار المخيم تشب
وشاف طفله ابلا محامي ... بسوط ضلّت تنضرب
زينب اعله التل تنادي .. وحده هذا شكد صعب
خويه راح انروح عنك ... ها يشمام الكَلب
ايتام ... والعطش سابيهه
ايتام ... فاركَت واليهه
ايتام ... بالبجي اتأذيني
ــــــــــــــ
الشاعر محمد حسن ضيغم باز کردن / نظر دهید

2022-08-19 11:18:42 يا ريحانة طه الهادي ... يبن الزهراء
كل كطرات الدم اتنادي ... يبن الزهراء
سر الاكوان
تصبح عطشان
وانت القران .. يبن الزهراء
ــــــــــــــ
يريحانة ابو الزهره ...اهو منك وانت منّه
يباب الله الفلا ينسد ... عطر كَبرك صبح جنه
الهي بجاه عبدالله ...الرضيع اللحضه متهنّه
باب امخيّم الخدمه ... مريدن ابتعد عنّه
اسمك مالك كل وجداني ... يبن الزهراء
لاتحرم كَلبي امن احزاني ... يبن الزهراء
ارزقني اجنون
واصبح مفتون
بحبك مسجون ... يبن الزهراء
ـــــــــــــــ
اسولف ساعه بجروحي ... وجروحي تسولف اعليّه
شنوا لبي فائده احجلّلي ... بدماهن اشّرن ليّه
كَالن هالعمر شنهي ... اذا مابيه لطميه
ومايحله اذا ما ماروح .. بدمعي للحسينيه
بس ليك انخلقت دمعاتي .. يبن الزهراء
وبسمك تتسطّر جلماتي ... يبن الزهراء
ها يالمحبوب
منك ماتوب
بجرحك مصيوب ... يبن الزهراء
ــــــــــــ
عجيبه المابجه اعليكم ...شكثر جا قاسي ضل كَلبه
اهو الماعايش اخيامك ... اكيدن ماعرف دربه
محنتك ياوجه طه ... وداعت خنصرك صعبه
هنيئاً للذي بصغره ... بعزائك سيدي اتربّه
تربّيه وتحسن تربيته ... يبن الزهرا
عاشك اولهه وتاليته ... يبن الزهراء
لو قلّد جون
يصبح مجنون
ويبجيك عيون ... يبن الزهراء
ـــــــــــــــ
الرحمه الواسعه انت ... وباب الرحمه تعزيتك
وجنة الله بالدنيه ... يبو الاكبر حسينيتك
يسر المنعرف معناه ... حسين اجبيره قدسيتك
ذبيح امسلّب وعريان ... وسفه اتصير تسميتك
يا ضامي ارويني بنفحاتك ... يبن الزهراء
وأجويني بجمره خيماتك ... يبن الزهراء
بس ليك ال آه
الهم والويلاه
وطفّك انعاه ... يبن الزهراء
ــــــــــــــ
صور تتجسّد بعيني ... وأذوبن شمعه يم نحرك
يصدر المصطفى وسفه ... الحوافر تسحك ابصدرك
ردت لمخيّمك توصل ... الضلوع اتشامرت حدرك
ورمح حسّيته يالوالي ... يغالي طلع من ضهرك
مكَطوع الخنصر بمينك ... يبن الزهراء
متوذّر من الله يعينك ... يبن الزهراء
ليش بلا راس
تجر الانفاس
فاكَد عباس ... يبن الزهراء
ـــــــــــــ
الشاعر محمد حسن ضيغم باز کردن / نظر دهید

2022-08-19 11:18:25 حسينا واحسيناه
.............
مد ايدك اليه ولا ترد ايدي
يمن فدوه الك كل اهلي ووليدي
فدوه العالم ايروح .. لجدامك يمذبوح
ــــــــــــــــ
يمفضّل علينه بنعمة الدمعه
خل عمري بعزائل يشتعل شمعه
ادري الصاح بسمك سيدي اتسمعه
وامّك فاطمه شما نندبك تنعه
ياحسين .. عيّشني جمرة خيامك
ياحسين ... ارد ابقه اهيم بهيامك
ياحسين ... يل ولّهتني بغرامك
عبدك انه عبدك وانت مالكني
وخلّي ادموعي بمصابك تشاركني
وابقى ابحزني والنوح .. لجدامك يمذبوح
ــــــــــــــــ
ماريدن عمر مابي اسم مجلس
وماريدن اسم ما يبتدي بعابس
بالحسينيه افخر لو كَمت اكنس
وبدروس العشكَ يباو العشك ادرس
ياحسين ... ماعندي غيرك يروحي
ياحسين ... بكَليبي زارع جروحي
ياحسين .. بس المصابك جروحي
ياباب الرجاء ورحمة الباري
على مصيبة خيامك وجّر ابناري
دم من كَلبي مسفوح .. لجدامك يمذبوح
ــــــــــــــــ
عاشرت الحزن والحزن عاشرني
وكلشي بدنيتي بطفّك يذكّرني
تحت اجدامك آنه اتراب احسبني
من تسحك عليه ولله تشرّفني
ياحسين ...خالقني الله المصابك
ياحسين ... عاجن خلقتي ابترابك
ياحسين ...ريت آنه اموت اعله بابك
انه عندي جرح لا ماردت يشفه
على النامت رقيه ابكربله ابصفّه
عنك رفضت تروح .. لجدامك يمذبوح
ــــــــــــــــ
سمّيني اعله كيفك عبد سمّيني
ومن دنيه الهوه يا سيدي اشريني
يمّك واكَف او مغلوله جفّيني
خجلان بحسرتي ودمعتي ابعيني
ياحسين ...آنه ادري ذنبي يألمك
ياحسين ... بس بدمعتي اكلمك
ياحسين ... خليني عاشك وأخدمك
يطردني محال حسين ابو الغيره
يل كل الوجود اتنعّم ابخيره
باب الرحمه مفنوح .. لجدامك يمذبوح
ــــــــــــــــ
عليك ابعثرة الركضت الك تشكي
ويم المنحر او يالعايله تبجي
احتارت ياهظم بي تبتدي وتحجي
وجبدك عالرمح تنظرله متوجّي
ياحسين ...الماعدهه والي وغريبه
ياحسين ... والخيمه ضلت سليبه
ياحسين ..مصيبتنه صاحت مصيبه
ارزقني نعمتك يابو عبدالله
شما يبعد عزائك خلني اوصلّه
وأعيش بكَلب مجروح .. لجدامك يمذبوح
ــــــــــــــــ
الشاعر محمد حسن ضيغم باز کردن / نظر دهید

2022-08-19 11:18:13 لبيك لبيك يا ابا عبد الله
ــــــــــ

عندي ايه من الزغر دوم اردد بيهه
كل ليالي امحرّمك واجب آنه احييهه
كلشي ابيعه ابدنيتي والتعازي اشريهه
ادري تنسر فاطمه دمعتي امنجريهه
بكَماطي ونحت
يالضامي صحت
ياوسفه طحت ... يا اباعبدالله
ــــــــــــــــــــ
هذا عهدي من الزغر وغايتي اعظم غايه
يومي مو يومي اذا ماحضرت اقرايه
من الطفوله بمأتمك شلت بيدي الرايه
لو ما دمعاتي عليك ماردت دنيايه
ماريد العمر
وضلعك منكسر
شيفيد الصبر ... يا اباعبدالله
ــــــــــــــــــــ
انت كلشي بهل وجود وانت سر اوجودي
بحبك الطاهر صدك اعرفت كل احدودي
لوله تعزيتي عليك ماطعت معبودي
آنه من عابس اكيد خذت عشكَي وزودي
محلات الجنون
كون اعمي العيون
الكل لجلك يهون ... يا اباعبدالله
ــــــــــــــــــــ
يا اميري ابصوتي اصيح فدوه تعتقني
خلني من بابك كَريب ارجوك لاتبعدني
حتى لو ميّت واصيح اعرفك تسمعني
بكَبري يانور الاله اندب وتحضرني
بكَبري وما امل
من دمعي اليهل
وينزاح الحمل ... يا اباعبدالله
ــــــــــــــــــــ

شما يمر بيّه الزمان يندبك وجداني
وادري لوما هل عزاء مانبض شرياني
من توزّع بالغرام فدوه لا تنساني
حروف اسمك ياحسين انطبعت اعله الساني
والي نعمتي
رافع قيمتي
بسمك سمعتي ... يا اباعبدالله
ــــــــــــــــــــ
الشاعر محمد حسن ضيغم باز کردن / نظر دهید