2022-07-08 09:51:52
كيف ولماذا أحيي يوم عرفة
أفكار و مقترحات :-
- ليه بنحيي يوم عرفة ؟
- لأنه يوم شرّفه الله بإنه بيباهي بأهل عرفة أهل السماء، يعني لو كنت في عرفة ربنا بيباهي بيك أهل السماء وفي بعض التفاسير أن حتى المتعبدين في عرفة.
- لأنها من الليالي المكرمة التي أقسم بها الله في سورة الفجر.
- لأنه أبلغ الدعاء و أحرى أوقات الإجابة يوم عرفة، كان الصحابة يجمعون كل دعائهم فيها و لا يأتي عرفة القادم الا و قد تحققت دعواتهم.
- الرسول عليه الصلاة والسلام سمى التسع ايام اللي من ضمنها عرفة أفضل أيام الدُّنيا يعني العبادة فيه أفضل من العبادة في أي وقت تاني من العام حتى أنه قال أن العمل في يوم عرفة أفضل من الجهاد في سبيل الله تعالى، فقال:
(ما العَمَلُ في أيَّامٍ أفْضَلَ منها في هذِه؟ قالوا: ولَا الجِهَادُ؟ قَالَ: ولَا الجِهَادُ، إلَّا رَجُلٌ خَرَجَ يُخَاطِرُ بنَفْسِهِ ومَالِهِ، فَلَمْ يَرْجِعْ بشيءٍ).
- طيب اغتنم اليوم كيف ؟
- أول شي جددوا التوبة فجر يوم عرفة توبة و استغفار حقيقي من جوة قلوبكم لأن التائب من الذنب كمن لاذنب له و لأن التوبة يجعل الله بها سيئاتنا حسنات.
- تاني شي خلصوا التزاماتكم الخاصة و العامة قبلها ولو فاضل ليكم شئ استحضروا النوايا اللي بتجعل كل لحظة بحسنة بس الأفضل ما تخلوا في عرفة غير العبادة ثم الضروريات ، السوق وشغل البيت ابذلوا جهدكم يخلصوا من يوم التروية الليلة (التامن)من زي الحجة.
- يوم الليلة حاولوا نوموا بدري ، و اجتهدوا انكم تلحقوا عرفة من قبل الفجر بنص ساعة عشان تعملوا 5 حاجات :
1 : أقيموا ليلة التاسع من زي الحجة (عرفة) ركعتين ركعتين و بعدها الشفع و الوتر.
2 : بعد السلام بعد كل ركعتين قولوا الخمس :
( تكبير، تهليل، تسبيح، ذكر مضاعف، استغفار).
3 : أكثروا من الدعاء وأنتم ساجدون بخير الدنيا والآخرة و اي شئ نفسكم فيهو.
4 : بعد كدا احرصوا انكم تتسحروا ، واستحضروا هنا نية اتباع سنة الرسول صلى الله عليه وسلم (اتباع السنة ليه أجر).
5 : أثناء السحور و لحدي ما تقوموا للفجر كتروا من الإستغفار عشان تكتبوا عند الله من المستغفرين في الأسحار .
- جددوا الوضوء للفجر و قولوا دعاء ما بعد الوضوء: اللهم اجعلنا من التوابين و من المتطهرين .
- صلوا الفجر ، و خلوكم في سجاداتكم ، لحدي بعد الشروق عشان تصلوا الضحى و تاخدوا بالجلسة دي أجر حجة و عمرة تامة مع الرسول صلى الله عليه وسلم ، طيب وقت الإنتظار دا حتعملوا فيهو ال 5حاجات تاني :
( تهليل، تسبيح، حمد، ذكر مضاعف ، أذكار الصباح) + تقروا قرآن كريم.
- بعد كدا عندكم مساحة تختاروا كيف تقضوا باقي وقتكم لكن اي شئ تعملوهو أثنائه اجتهدوا انكم تقولوا الخمس :(تهليل، تسبيح، حمد، ذكر مضاعف ، استغفار).
- نصيحة طول اليوم برضو كتروا التلبية و أفتحوا قناة بتنقل مراسم الحج كاملة حتستشعروا كل لحظة و تستجلبوا لقلوبكم شعور الخشوع.
- لو عندكم ختمة استأنفوها و وقَّتوا نهايتها مع صعود الحجاج على جبل عرفات عشان تدعي في أحرى الأوقات بالإجابة لحظة الوقوف بعرفات و نهاية الختمة.
- حاولوا تمتنعوا عن أي ذنب في يوم عرفة و خليكم حذريين من ضياع اليوم.
- طيب كيف حندعي و بماذا ؟
- ادعوا بيقين و استبقوا الدعاء بالحمد و اختموهو بالصلاة على الحبيب المصطفى صلى الله عليه وسلم.
- اغتنموا لحظات السجود، آخر لحظات مع الوقوف بعرفة و الإفطار، و طول اليوم كل ما تحبوا استقبلوا القبلة ورددوا دعواتكم.
- اتذكروا انه أكبر مدخل للشيطان إنه يمسك الدعوة الما اتحققت ليك و يذكرك بيها و ينسيك كل الأدعية المستجاب اللي أولها اللهم بلغنا إياه مرات عديدة و أزمنة مديدة ، فدي براها استجابة كوننا بلغناه و ربنا أكرمنا و إن شاء الله يبلغنا اياه تاني ، ياما ناس دعوا بحاجات و بعدين اكتشفوا انها شر عظيم عليهم ربنا وصف حالنا بآية دقيقة ؛ قال تعالى:( وَيَدْعُ الْإِنسَانُ بِالشَّرِّ دُعَاءَهُ بِالْخَيْرِ ۖ وَكَانَ الْإِنسَانُ عَجُولًا ) ، تخيلوا انكم ممكن تكونوا بتطلبوا الشر بنفس لهفتكم على الخير ؟ عشان كدا حكمة ربنا هي الفيصل.
- خليكم متيقنيين أي دعاء ندعيهو فهو مستجاب لكن تبعاً لحكمة الله و ليس نظرنا القاصر و بصيرتنا التي لا تبلغ شيئاً في حكمته قال النبي - صلى الله عليه وسلم :(مَا مِنْ مُسْلِمٍ يَدْعُو بِدَعْوَةٍ لَيْسَ فِيهَا إِثْمٌ وَلَا قَطِيعَةُ رَحِمٍ، إِلَّا أَعْطَاهُ اللَّه بِهَا إِحْدَى ثَلَاثٍ إِمَّا أَنْ تُعَجَّلَ لَهُ دَعْوَتُهُ، وَإِمَّا أَنْ يَدَّخِرَهَا لَهُ فِي الْآخِرَةِ، وَإِمَّا أَنْ يَصْرِفَ عَنْهُ مِنَ السُّوءِ مِثْلَهَا).
= بلغنا الله وإياكم مواسم طاعته مقبلات غير مدبرات دائماً.
95 viewsMunzir Ismail, 06:51
م
