هاك إخذ هالراية . و شارك المشاية أمشي دربك للأخير بلا رجوع | الشاعر علي حسن الكناني

هاك إخذ هالراية . و شارك المشاية

أمشي دربك للأخير بلا رجوع
ماكو خوف إبهالمسير و ماكو جوع

شارك المشاية . شارك المشاية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛

وين هاي الناس كلها خل تلبي هالنداء
كون كل واحد يسمعه مشي يمشي الكربلاء
ماكو سني و ماكو شيعي و ماكو سين و ماكو ياء
حتى لو زاير مسيحي . كلنه بعيونه سواء

هو عالم بينه . و من نجي يحيينه

يا هلا بأمة محمد و اليسوع
ماكو خوف إبهالمسير و ماكو جوع

شارك المشاية . شارك المشاية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

إحنه خدام الحسين و هو هذا منهجه
يا هلا بكل من وصلني و يا هلا بكلمن إجه
ما نخلي الجاي يتعب و المريض نعالجه
والله من كل الطوائف هالمواكب ناتجه

هذا طبع حسيني . بيهم موصيني

يگول اريد انظر طوائف بالجموع
ماكو خوف إبهالمسير و ماكو جوع

شارك المشاية . شارك المشاية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

نريد كل الدنيا تحضر مشي يوم الأربعين
لو ألف مليون زاير ما يردهم خائبيين
جنة الكافل چبيرة و تتسع للزائرين
حسين يهتف (( أدخلوها بسلامٍ آمنين ))

خل تشوف الوادم . ليش أصيرن خادم

يمكن العالم يشاركني الدموع
ماكو خوف إبهالمسير و ماكو جوع

شارك المشاية . شارك المشاية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

هالبشر كلهم سواسي و آنه لحسين أنتمي
أبد ما زعل إليزوره عربي لو أعجمي
الناس من كل العواصم شاركتني إبمأتمي
إذن إسمه يصير يوم الأربعين العالمي

مثله لا ما تلگه . الناس كلها تعشگه

بكل وطن عشاگه تعلگله شموع
ماكو خوف إبهالمسير و ماكو جوع

شارك المشاية . شارك المشاية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

حسين ما ضم حزب واحد حسين باقي للجميع
والله كلمن فهم نهجه يصير إله خادم مطيع
للمشي بيوم أربعينه ما گلت ما أستطيع
عالم المشاية يسحر و شفت هالعالم بديع

من أشيل الراية . أفرح آنه إهوايه

عدد بيها چبير بيها أغلا نوع
ماكو خوف إبهالمسير و ماكو جوع

شارك المشاية . شارك المشاية

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

#علي_حسن_الكناني
#شارك_المشاية

معرف الخاص

@Ali22kinani

معرف الإنستا

Sh_a_h_k

https://t.me/kinani16