2023-07-04 02:49:36
ماف زول في الدنيا ممكن ياخد من مكانو القاعد فيه عيشة "رغيفة" وحدة زيادة على الربنا كتبها لينا
الأقدار كلها مكتبة ومسطرة من قبل ما نتولد، أقدارنا معروفة!
بتبقى بس في الأسباب والمسببات البتخلينا نخت العيشة الفي يدنا لسبب ما ونفتش عيشة تانية في مكان تاني
ايوة معاكم انو مرات الحياة خياراتها بتكون ضيقة شديد
لدرجة بنرمي نفسنا في الهلاك من حيث لا نشعر
وبنفتكر انو دي النهاية
بس و لحكمة إلهية بنلقى انو النفق الإفتكرناه مضلم هناااك في ضو في آخرو!
عشان كدة نرجع ونتذكر الآية البتقول "وعسى أن تكرهو شيئاً وهو خير لكم"
احنا ما علينا إلا نرضى بالمكتوب
لأنو سواء رضينا أو ابينا فاالمكتوب مكتوب!
ف ليه نضيع طاقتنا دي في الجرسة و ندب الحاصل والزعل؟؟
في حين ممكن نستثمرها في إننا نركز على المصيبة الحاصلة علينا و نطلع منها بأقل الأضرار و نقدر نغير الواقع المفاجئ دا أو على أقل تقدير -نتعايش معاه!
و لو فهمنا"أمر المؤمن كله خير" وآمنا بالكلام دا فعلاً،حنلقى نفسنا بنخوض كل الصعاب بكل قلب قوي
واحنا متأكدين بما لا يدع مجال للشك انو ربنا معانا و ما حيضيعنا!
وجوانا إيمان تام إنو كل شي بحصل لينا لخيير ف نفرح ونتطمن
#زبيدة_الزومة
#زُبيديات
469 viewszubida Alzoma, 23:49